രാജാക്കാട്: ഇടുക്കി ചിന്നക്കനാല് ചെമ്പകത്തൊഴുകുടിക്ക് സമീപം സ്കൂട്ടര് മറിഞ്ഞ് അമ്മയും മകളും ഉള്പ്പെടെ മൂന്ന് പേര് മരിച്ചു. തിടിനഗര് സ്വദേശി മണികണ്ഠന്റെ ഭാര്യ അഞ്ജലി (27), മകള് അമയ (4), മണികണ്ഠന്റെ സഹോദരന് ശെല്വത്തിന്റെ ഭാര്യ ജെന്സി (19) എന്നിവരാണ് മരിച്ചത്. ഇന്നലെ വൈകിട്ട് അഞ്ചോടെയാണ് സംഭവം.
എറണാകുളം കുമ്പളങ്ങി സ്വദേശിയാണ് അഞ്ജലി. എറണാകുളത്തെ ഒരു സ്വകാര്യസ്ഥാപനത്തില് ജോലി ചെയ്യുന്ന മണികണ്ഠന് കഴിഞ്ഞ ദിവസമാണ് കുടുംബ സമേതം വീട്ടിലെത്തിയത്. രണ്ടു മാസം മുന്പായിരുന്നു ശെല്വത്തിന്റെയും ജെന്സിയുടെയും വിവാഹം. ഇന്നലെ വൈകിട്ട് അഞ്ജലി മകള്ക്കും ജെന്സിക്കുമൊപ്പം സൂര്യനെല്ലിക്ക് പോയി തിരികെ വരുമ്പോഴാണ് അപകടം.
ചെമ്പകത്തൊഴുകുടി സ്കൂളിന് സമീപമുള്ള കുത്തിറക്കത്തില് വളവ് തിരിയാതെ സ്കൂട്ടര് 25 അടി താഴ്ചയിലുള്ള ഇതേ റോഡിലേക്ക് മറിയുകയായിരുന്നു. തലയ്ക്കും നെഞ്ചിനും ഗുരുതരമായി പരിക്കേറ്റ അമയ തല്ക്ഷണം മരിച്ചു. അഞ്ജലിയെ അടിമാലി താലൂക്കാശുപത്രിയിലെത്തിച്ചെങ്കിലും രക്ഷിക്കാനായില്ല. ജെന്സിയെ തേനി മെഡിക്കല് കോളജിലേക്ക് കൊണ്ടുപോകുംവഴി മരിച്ചു. അഞ്ജലിയുടേയും അമയയുടേയും മൃതദേഹം അടിമാലി താലൂക്കാശുപത്രി മോര്ച്ചറിയിലേക്ക് മാറ്റി. ജെന്സിയുടെ മൃതദേഹം തേനി മെഡിക്കല് കോളജിലും.
മൃതദേഹങ്ങള് പോസ്റ്റുമോര്ട്ടത്തിന് ശേഷം ഇന്ന് ബന്ധുക്കള്ക്ക് വിട്ട് നല്കും. ശാന്തന്പാറ പോലീസ് മേല്നടപടികള് സ്വീകരിച്ചു.
