ന്യൂദല്‍ഹി: തെരഞ്ഞെടുപ്പില്‍ അപരന്മാര്‍ മത്സരിക്കുന്നത് വിലക്കണമെന്ന് ആവശ്യപ്പെട്ടുള്ള ഹര്‍ജി സുപ്രീംകോടതി പരിഗണിക്കാന്‍ വിസമ്മതിച്ചു. പ്രമുഖ രാഷ്‌ട്രീയ നേതാക്കളുടെ അതേ പേരുള്ളതുകൊണ്ട് നാമനിര്‍ദേശ പത്രിക സമര്‍പ്പിച്ച ആരെയും മത്സരിക്കുന്നതില്‍ നിന്ന് വിലക്കാന്‍ സാധിക്കില്ലെന്ന് കോടതി അറിയിച്ചു.
അപരന്മാര്‍ തെരഞ്ഞെടുപ്പില്‍ മത്സരിക്കുന്നത് വിലക്കണമെന്നാവശ്യപ്പെട്ട് സാബു സ്റ്റീഫനെന്ന വ്യക്തിയാണ് സുപ്രീംകോടതിയെ സമീപിച്ചത്. ഒരേ പേരുള്ളവര്‍ മത്സരിക്കുന്നത് വോട്ടര്‍മാര്‍ക്ക് ആശയക്കുഴപ്പമുണ്ടാക്കുന്നുവെന്നും പ്രമുഖ സ്ഥാനാര്‍ത്ഥികളില്‍ പലരും ചെറിയ വ്യത്യാസത്തില്‍ തോല്‍ക്കാന്‍ വരെ സാധ്യതയുണ്ടെന്നും ഹര്ജിക്കാരന് കോടതിയില്‍ പറഞ്ഞു. സ്വതന്ത്രവും നീതിയുക്തവുമായ തെരഞ്ഞെടുപ്പ് പ്രക്രിയയുടെ താത്പര്യം കണക്കിലെടുത്ത് ഈ പ്രവണത അവസാനിപ്പിക്കാന്‍ അടിയന്തര നടപടികള്‍ കൈക്കൊള്ളാന്‍ തിരഞ്ഞെടുപ്പ് കമ്മിഷന് നിര്‍ദേശം നല്കണമെന്നും ഹര്‍ജിയില്‍ ആവശ്യപ്പെട്ടിരുന്നു.
ഏതെങ്കിലും രക്ഷിതാക്കള്‍ രാഹുല്‍ ഗാന്ധിയെന്നും ലാലുപ്രസാദ് യാദവെന്നും തങ്ങളുടെ കുട്ടികള്‍ക്ക് പേരിട്ടാല്‍ അവരെ മത്സരിക്കുന്നതില്‍ നിന്ന് എങ്ങനെ വിലക്കാന്‍ കഴിയുമെന്ന് സുപ്രീംകോടതി ചോദിച്ചു. ഹര്‍ജി പരിഗണിക്കാന്‍ തയാറാകാതിരുന്ന ജസ്റ്റിസ് ബി.ആര്‍. ഗവായ് അത് പിന്‍വലിക്കാന്‍ ഹര്ജിക്കാരന് അനുവാദവും നല്കി.
പ്രതികരിക്കാൻ ഇവിടെ എഴുതുക: