പത്തനംതിട്ട : കടമ്പനാട്ട് എട്ടുവയസ്സുകാരിയുടെ മരണം ഷിഗല്ല ബാക്ടീരിയ ബാധ മൂലമെന്ന സംശയം നിലനില്‍ക്കെ പ്രദേശത്ത് കരുതല്‍ നടപടികള്‍ ഊര്‍ജിതമാക്കി. കടമ്പനാട് ഗണേശ വിലാസം അവന്തിക നിവാസില്‍ മനോജിന്‌റെയും ചിത്രയുടെയും മകള്‍ അവന്തികയാണ് വയറിളക്കവും ഛര്‍ദിയും കലശലായതിനെത്തുടര്‍ന്ന് കോട്ടയം മെഡിക്കല്‍ കോളേജ് ആശുപത്രിയില്‍ മരിച്ചത് . 30ന് രാവിലെ അടൂര്‍ ജനറല്‍ ആശുപത്രിയില്‍ പ്രവേശിപ്പിച്ച അവന്തികയുടെ നില വഷളായതോടെയാണ് കോട്ടയം മെഡിക്കല്‍ കോളേജിലേക്ക് മാറ്റിയത്. മെഡിക്കല്‍ കോളേജില്‍ നിന്നുള്ള സര്‍ട്ടിഫിക്കറ്റില്‍ മരണകാരണം ഷിഗല്ല ബാക്ടീരിയ മൂലമെന്ന് രേഖപ്പെടുത്തിയിട്ടുണ്ട്. എന്നാല്‍ ഇത് സ്ഥിരീകരിക്കുന്ന തരത്തില്‍ പരിശോധന നടത്തിയിട്ടില്ലെന്ന് കുട്ടിയുടെ ബന്ധുക്കള്‍ പറയുന്നു. അറന്തക്കുളങ്ങര എല്‍. പി. സ്‌കൂള്‍ വിദ്യാര്‍ത്ഥിനിയായിരുന്നു അവന്തിക. സംസ്‌കാരം നടത്തി.
കടമ്പനാട്ടും പരിസരങ്ങളിലും ശുചീകരണ പ്രവര്‍ത്തനങ്ങള്‍ ഉചിതമാക്കിയിട്ടുണ്ട് . കിണര്‍ വെള്ളം പരിശോധനയ്‌ക്കായി അയച്ചിട്ടുണ്ട്.
