മലപ്പുറം: നരേന്ദ്ര മോദി സര്‍ക്കാരിന്റെ ഭരണത്തില്‍ രാജ്യം ഡിജിറ്റലൈസായെന്നും ഇന്ത്യ 5ജി സേവനത്തില്‍ നിന്നും 6ജിയിലേക്ക് കടക്കാന്‍ ഒരുങ്ങുകയാണെന്നും കേന്ദ്ര മന്ത്രി വി.കെ. സിങ്. മലപ്പുറം ലോക്‌സഭാമണ്ഡലത്തില്‍ എടവണ്ണപ്പാറ വാഴക്കാട് നടന്ന ലീഡേഴ്‌സ് മീറ്റില്‍ സംസാരിക്കുകയായിരുന്നു അദ്ദേഹം.
ഗ്രാമങ്ങളില്‍ ഉള്‍പ്പടെ സാമൂഹ്യമാധ്യമങ്ങള്‍ ഉപയോഗിക്കാനുള്ള അവസരം ഉണ്ടായത് നരേന്ദ്ര മോദി അധികാരത്തില്‍ വന്ന ശേഷമാണ്. ഇന്ന് നമ്മുടെ ഗ്രാമങ്ങള്‍ എല്ലാം ഡിജിറ്റലായിരിക്കുന്നു. 2014ല്‍ ഇന്റര്‍നെറ്റ് ഡാറ്റ ഉപയോഗിക്കാനുള്ള ചെലവും ഇന്നത്തെ നിരക്കും പരിശോധിച്ചാല്‍ പ്രതിമാസം 3000 രൂപയുടെ വ്യത്യാസം കാണാനാവും. രാജ്യത്ത് 60 ശതമാനം പേരും യുപിഐ പേമെന്റ് ഉള്‍പ്പടെയുള്ള ഡിജിറ്റല്‍ ട്രാന്‍സാക്ഷനാണ് ഉപയോഗിക്കുന്നതെന്നും അദ്ദേഹം വ്യക്തമാക്കി.
ഭാരത പാസ്‌പോര്‍ട്ടിന് 2014 ല്‍ ഉള്ളതിനേക്കാള്‍ പരിഗണന ഇന്ന് ലഭിക്കുന്നു. ഇത് ലോകരാജ്യങ്ങള്‍ക്കിടയില്‍ ഭാരതം കൈവരിച്ച നേട്ടത്തിന്റെ ഫലമായാണ്. ഭാരതത്തില്‍ ഡിജിറ്റലൈസേഷന്‍ അതിവേഗത്തില്‍ മുന്നേറുമ്പോഴും കേരളം ഏറെ പിന്നിലാണ്. അദ്ദേഹം പറഞ്ഞു.
ബിജെപി സംസ്ഥാന വൈസ് പ്രസിഡന്റ് വി.വി. രാജന്‍, മേഖലാ ജനറല്‍ സെക്രട്ടറി എം. പ്രേമന്‍, ചീഫ് ഇലക്ഷന്‍ ഏജന്റ് കെ. രാമചന്ദ്രന്‍, സംസ്ഥാന കമ്മിറ്റി അംഗം അഡ്വ. ശ്രീപ്രകാശ്, മഹിളാ മോര്‍ച്ച ജില്ലാ പ്രസിഡന്റ് ദീപാ പുഴക്കല്‍, മണ്ഡലം പ്രസിഡന്റ് ഷിബു, ജനറല്‍ സെക്രട്ടറി സുരേഷ് കുമാര്‍ തുടങ്ങിയവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: