ഫ്‌ളോറിഡ: സൂപ്പര്‍ താരം ലയണല്‍ മെസിയുടെ ഇരട്ട ഗോളില്‍ മേജര്‍ ലീഗ് സോക്ക(എംഎല്‍എസ്)റില്‍ ഇന്റര്‍ മയാമിക്ക് ജയം. ഇതോടെ എംഎല്‍എസ് ഈസ്‌റ്റേണ്‍ കോണ്‍ഫറന്‍സില്‍ മയാമിക്ക് ഒന്നാം സ്ഥാനം തിരികെ പിടിക്കാനായി.
ഇന്നലെ നടന്ന മത്സരത്തില്‍ നാഷ്‌വില്ലെയ്‌ക്കെതിരെ തുടക്കത്തിലേ ഗോള്‍ വഴങ്ങിയ ശേഷമായിരുന്നു മയാമി മൂന്ന് ഗോളുകള്‍ തിരിച്ചടിച്ചത്. മെസിയുടെ ഇരട്ടഗോള്‍ കൂടാതെ താരത്തിനൊപ്പം ബാഴ്‌സയിലുണ്ടായിരുന്ന സെര്‍ജിയോ ബുസ്‌ക്വെറ്റ്‌സും ഗോള്‍ നേടി. ഒരു വര്‍ഷത്തോളമായി മയാമിയിലുള്ള ബുസ്‌ക്വെറ്റ്‌സ് ക്ലബ്ബിനായി നേടുന്ന ആദ്യ ഗോളാണിത്.
കളിക്ക് രണ്ട് മിനിറ്റായപ്പോള്‍ തന്നെ നാഷ്‌വില്ലെ മുന്നിലെത്തി. നാഷ്‌വില്ലെയ്‌ക്ക് അനുകൂലമായ കോര്‍ണര്‍ കിക്ക് തടയാന്‍ ശ്രമിച്ച മയാമി പ്രതിരോധ താരം ഫ്രാങ്കോ നെറിയുടെ മേല്‍ തട്ടി പന്ത് സ്വന്തം വലയില്‍ കയറുകയായിരുന്നു. 12-ാം മിനിറ്റില്‍ മെസിയിലൂടെ മയാമി മറുപടി നല്‍കി. കളി സമനിലയില്‍ പുരോഗമിക്കവെ 39 മിനിറ്റെത്തയപ്പോഴായിരുന്നു ബുസ്‌ക്വെറ്റ്‌സിന്റെ ഗോള്‍. ആദ്യ പകുതയില്‍ തന്നെ മയാമി 2-1ന് മുന്നിലെത്തി. രണ്ടാം പകുതിയില്‍ മെസി ഇരട്ടഗോള്‍ തികച്ചു. 81-ാം മിനിറ്റില്‍ ലഭിച്ച പെനല്‍റ്റി ഗോളാക്കിയാണ് മെസി സ്‌കോര്‍ 3-1 ആക്കി ഉയര്‍ത്തിയത്.
