തൃശ്ശൂർ: പൊലീസിന്റെ കൈകടത്തല് മൂലം തൃശൂര് പൂര അലങ്കോലമായി എന്ന പരാതി ശക്തമാകുന്നതിനിടയില് പൊലീസിനെതിരെ പരാതിയുയര്ത്തുന്ന പുതിയ വീഡിയോ ദൃശ്യങ്ങള് പ്രചരിക്കുന്നു.
ആനകൾക്ക് പട്ട കൊണ്ടുവരുന്നവരെയും കുടമാറ്റത്തിന് കുട കൊണ്ടുവരുന്നവരെയും പോലീസ് തടയുന്ന ദൃശ്യങ്ങളാണ് വീഡിയോയില് ഉള്ളത്. തൃശ്ശൂർ സിറ്റി പോലീസ് കമ്മീഷണർ അങ്കിത് അശോകിന്റെ നേതൃത്വത്തിലാണ് പട്ടയും കുടയും കൊണ്ടുവരുന്നവരെ തടഞ്ഞത് എന്ന് വ്യക്തമാക്കുന്ന വീഡിയോ ദൃശ്യങ്ങള് പുറത്തുവന്നിരിക്കുകയാണ്.
‘എടുത്തുകൊണ്ടു പോടാ പട്ട’ എന്ന് കമ്മീഷണർ കയർക്കുന്നതും ദൃശ്യങ്ങളിൽ കാണാം. തിരുവമ്പാടിയുടെ കുടമാറ്റത്തിനുള്ള ശ്രീരാമന്റെ ചിത്രമുള്ള കുട കൊണ്ടുവന്നവരെയും പോലീസ് തടഞ്ഞു.
എന്നാൽ ഒരു പട്ടയോ കുടയോ കൊണ്ട് നിരവധി പേർ അകത്തു കടക്കാൻ ശ്രമിച്ചപ്പോഴാണ് തടഞ്ഞത് എന്നാണ് കമ്മീഷണറുടെ വിശദീകരണം. പൂരം പ്രതിസന്ധിയിൽ അന്വേഷണം വേണമെന്ന് ബിജെപി ആവശ്യപ്പെട്ടു.
