മലപ്പുറം: പറഞ്ഞതെല്ലാം നടപ്പിലാക്കിയ സര്‍ക്കാരാണ് പ്രധാനമന്ത്രി നരേന്ദ്രമോദി നയിക്കുന്ന എന്‍ഡിഎ സര്‍ക്കാരെന്ന് ബിജെപി ദേശീയ നിര്‍വാഹ സമിതി അംഗം കുമ്മനം രാജശേഖരന്‍. ധര്‍മ്മത്തിനും നീതിക്കും സത്യത്തിനും വേണ്ടിയുള്ള പോരാട്ടമാണ് ഈ തെരഞ്ഞെടുപ്പ്. ജനങ്ങളെ വഞ്ചിക്കാതെ സത്യസന്ധമായ നിലപാടാണ് മോദി സ്വീകരിച്ചതെന്നും അദേഹം വ്യക്തമാക്കി.
യുഡിഎഫും എല്‍ഡിഎഫും ഇപ്പോഴും പറഞ്ഞ് പഴകിയ മാമൂലുകളും വാഗ്ദാനങ്ങളും പൊടിതട്ടിയെടുത്ത് ജനങ്ങള്‍ക്ക് മുന്നില്‍ വീണ്ടും അവതരിപ്പിക്കുകയാണ്. ജനങ്ങള്‍ക്ക് വേണ്ടി അവര്‍ ഒന്നുചെയ്‌ത്തിട്ടില്ല അതുകൊണ്ടുതന്നെ ഒന്നു പറയാനുമില്ല. കഴിഞ്ഞ 10 വര്‍ഷത്തിനിടെ എന്‍ഡിഎയ്‌ക്ക് പറയാന്‍ നേട്ടങ്ങള്‍ മാത്രമേ ഉള്ളു. പറഞ്ഞ് ചതിച്ചവരെയല്ല വാഗ്ദാനങ്ങള്‍ നടത്തി കാണിച്ചവരെയാണ് ജനങ്ങള്‍ക്ക് ആവശ്യമെന്നും കുമ്മനം പറഞ്ഞു.
നരേന്ദ്രമോദി അഴിമതിക്കാരെയാണ് പിടികൂടിക്കൊണ്ടിരിക്കുന്നത്. അത് ജനങ്ങള്‍ക്ക് മനസിലായി. കേന്ദ്ര സര്‍ക്കാര്‍ ജനങ്ങള്‍ക്ക് ഫലപ്രദമായ പദ്ധതികള്‍ നടപ്പിലാക്കുന്നു. അദ്ദേഹം നടപ്പിലാക്കിയ കാര്യങ്ങള്‍ മാത്രമേ ജനങ്ങളോട് പറഞ്ഞിട്ടുള്ളു. കേരളത്തില്‍ നാലരലക്ഷം കോടി രൂപയുടെ കടമല്ലാതെ പിണറായി സര്‍ക്കാര്‍ ഒന്നും നടപ്പിലാക്കിയില്ല. പ്രധാനമന്ത്രി അന്നദാതാവും പിണറായി വിജയന്‍ അന്നം മുടക്കിയുമാണ്.
പ്രതികരിക്കാൻ ഇവിടെ എഴുതുക