കെനിയന് സൈനിക മേധാവി ഉള്പ്പെടെ 10 പേര് ഹെലികോപ്റ്റര് അപകടത്തില് കൊല്ലപ്പെട്ടു. കെനിയയുടെ വടക്കുപടിഞ്ഞാറന് ഭാഗത്തുണ്ടായ അപകടത്തിലാണ് സൈനിക മേധാവി ഫ്രാന്സിസ് ഒഗോല്ല ഉള്പ്പടെ പത്തുപേര് മരിച്ചതെന്ന് പ്രസിഡന്റ് വില്യം റൂട്ടോ അറിയിച്ചു.
രണ്ടുസൈനികർ രക്ഷപ്പെട്ടു. തലസ്ഥാനമായ നെയ്റോബിയിൽ നിന്ന് ഏകദേശം 400 കിലോമീറ്റർ അകലെ എൽജിയോ മറക്വെറ്റ് കൗണ്ടിയിൽ വ്യാഴാഴ്ച ഉച്ചയ്ക്ക് 2:20 നാണ് അപകടമുണ്ടായത്. ചെസെഗോൺ ഗ്രാമത്തിൽ നിന്ന് പറന്നുയർന്നതിനു തൊട്ടുപിന്നാലെയാണ് ഹെലികോപ്റ്റർ തകർന്നത്. അപകട കാരണം വ്യക്തമായിട്ടില്ല.
യുദ്ധവിമാന പൈലറ്റായ ഒഗോല, കഴിഞ്ഞ വര്ഷമാണ് സൈനിക മേധാവിയായി നിയമിതനായത്. 40 വര്ഷമായി സൈന്യത്തില് സേവനം അനുഷ്ഠിച്ചു വരികയായിരുന്നു. ഒഗോലയുടെയും കമാന്ഡര്മാരുടേയും മരണത്തില് കെനിയന് പ്രസിഡന്റ് വില്യം റൂട്ടോ അനുശോചനം രേഖപ്പെടുത്തി.
അപകടവിവരം അറിഞ്ഞ ഉടന് തന്നെ പ്രസിഡന്റ് റൂട്ടോ ദേശീയ സുരക്ഷാ കൗണ്സിലിന്റെ അടിയന്തര യോഗം വിളിച്ച് സ്ഥിതിഗതികള് വിലയിരുത്തി. സൈനിക മേധാവിയുടെ മരണത്തില് പ്രസിഡന്റ് രാജ്യത്ത് മൂന്നു ദിവസത്തെ ദുഃഖാചരണം പ്രഖ്യാപിച്ചു. അപകടത്തില് കെനിയന് വ്യോമസേന അന്വേഷണം പ്രഖ്യാപിച്ചിട്ടുണ്ട്.
