തിരുവനന്തപുരം:ജെസ്‌ന തിരോധാന കേസന്വേഷണം അവസാനിപ്പിക്കണമെന്ന സി ബി ഐ വാദവും അതിനെ എതിര്‍ത്തുളള ജസ്‌നയുടെ പിതാവിന്റെ ഹര്‍ജിയിലും വിശദീകരണവുമായി സിബിഐ കോടതിയില്‍.ജസ്‌നയുടെ മുറിയില്‍ നിന്ന് രക്തം പുരണ്ട വസ്ത്രം കണ്ടെടുത്തെന്ന ജസ്‌നയുടെ പിതാവിന്റെ വാദം ശരിയല്ലെന്നും അങ്ങനെ ഒരു സംഭവം ഉണ്ടായിട്ടില്ലെന്നും സി ബി ഐ കോടതിയില്‍ പറഞ്ഞു.
ജെസ്‌ന ഗര്‍ഭിണി ആയിരുന്നില്ലെന്നും അന്വേഷണ ഉദ്യോഗസ്ഥനായ സിബിഐ ഇന്‍സ്‌പെക്ടര്‍ നിപുല്‍ ശങ്കര്‍ തിരുവനന്തപുരം ചീഫ് ജുഡീഷ്യല്‍ മജിസ്‌ട്രേറ്റ് കോടതിയെ അറിയിച്ചു. ജെസ്‌നയുടെ രക്തക്കറ അടങ്ങിയ വസ്ത്രങ്ങള്‍ ക്രൈംബ്രാഞ്ച് സിബിഐക്ക് കൈമാറിയെന്ന പിതാവിന്റെ മൊഴിയില്‍ വ്യക്തതയ്‌ക്കായാണ് കോടതി അന്വേഷണ ഉദ്യോഗസ്ഥനെ വിളിച്ച് വരുത്തിയത്.
അതേസമയം, കേസില്‍ ചില പ്രധാന വിവരങ്ങളില്‍ സിബിഐ അന്വേഷണം ഉണ്ടായിട്ടില്ലെന്ന് ജെസ്‌നയുടെ പിതാവ് കോടതിയില്‍ പറഞ്ഞു. കേസ് ആദ്യം അന്വേഷിച്ച ഉദ്യോഗസ്ഥരുടെ മൊഴി സിബിഐ എടുത്തിട്ടില്ലെന്ന ആരോപണവും ശരിയല്ലെന്നും കേസില്‍ ആവശ്യമുളള എല്ലാവരുടെയും മൊഴിയെടുത്തുവെന്നും അന്വേഷണ ഉദ്യോഗസ്ഥന്‍ കോടതിയെ അറിയിച്ചു. കേസ് ഈ മാസം 23 ന് പരിഗണിക്കാന്‍ മാറ്റി.
കാഞ്ഞിരപ്പള്ളി എസ് ഡി കോളേജ് വിദ്യാര്‍ത്ഥിനിയായ ജെസ്നയെ 2018 മാര്‍ച്ച് മാര്‍ച്ച് 22 നാണ് കാണാതാകുന്നത്. ലോക്കല്‍ പൊലീസും പ്രത്യേക സംഘവും ക്രൈം ബ്രാഞ്ചും അന്വേഷിച്ച ശേഷമാണ് ഹൈക്കോടതി നിര്‍ദ്ദേശാനുസരണം കേസ് സിബിഐ ഏറ്റെടുത്തത്. 2021 ഫെബ്രുവരില്‍ കേസേറ്റെടുത്ത സിബിഐക്കും ജെസ്‌ന കണ്ടെത്താനായില്ല.
പ്രതികരിക്കാൻ ഇവിടെ എഴുതുക: