വയനാട് : സുഗന്ധഗിരി മരംമുറിക്കല്‍ കേസില്‍ ഡിഎഫ്ഒ ഉള്‍പ്പെടെ മൂന്നു ഉദ്യോഗസ്ഥര്‍ക്ക് സസ്പന്‍ഷന്‍. വനം കൊള്ളയ്‌ക്ക് കൂട്ടുനിന്നതിനാണ് നടപടി. ഡി എഫ് ഒ എം ഷജ്ന കരീം, ഫ്ളയിങ് സ്‌ക്വാഡ് റേഞ്ച് ഫോറസ്റ്റ് ഓഫീസര്‍ എം സജീവന്‍, ഡെപ്യൂട്ടി റേഞ്ച് ഫോറസ്റ്റ് ഓഫീസര്‍ ബീരാന്‍കുട്ടി എന്നിവര്‍ക്കാണ് സസ്പന്‍ഷന്‍. വകുപ്പ് തല അന്വേഷണത്തില്‍ 18 ഉദ്യോഗസ്ഥര്‍ കുറ്റക്കാരാണെന്ന് കണ്ടെത്തിയിരുന്നു.പിന്നാലെ കല്‍പ്പറ്റ റേഞ്ച് ഓഫീസറെ സസ്പന്‍ഡ് ചെയ്തു.
അനധികൃതമായി മരം മുറിച്ച് കടത്തിയ കേസില്‍ ഇതോടെ സസ്പന്‍ഷനിലാകുന്ന വനം വകുപ്പ് ജീവനക്കാരുടെ എണ്ണം ഒമ്പതായി.
ജീവനും സ്വത്തിനും വീടിനും ഭീഷണി സൃഷ്ടിച്ചിരുന്ന 20 മരം മുറിക്കാന്‍ നല്‍കിയ അനുമതിയുടെ മറവില്‍ 126 മരങ്ങള്‍ മുറിച്ചു കടത്തിയെന്നാണ് കേസ്. മുപ്പതോളം ജീവനക്കാര്‍ 24 മണിക്കൂറും നിരീക്ഷണം നടത്തുന്ന പ്രദേശത്താണ് വനംകൊള്ള നടന്നത്. ഭൂരഹിതരായ ആദിവാസികള്‍ക്ക് 5 ഏക്കര്‍ വീതം പതിച്ചു കൊടുക്കാന്‍ ഉപയോഗിച്ച 1,086 ഹെക്ടറിലാണ് മരം കൊള്ള നടന്നത്.
വീട്ടി ഉള്‍പ്പെടെ സംരക്ഷിതമരങ്ങള്‍ മുറിച്ചുനീക്കിയവയില്‍ ഉള്‍പ്പെടുന്നില്ല.വനംവകുപ്പ് രജിസ്റ്റര്‍ ചെയ്ത കേസില്‍ ആറ് പ്രതികളാണുള്ളത്. മരത്തടികള്‍ വീണ്ടെടുക്കാന്‍ കഴിഞ്ഞിട്ടുണ്ടെന്നും വനംവകുപ്പുദ്യോഗസ്ഥര്‍ വ്യക്തമാക്കി.
പ്രതികരിക്കാൻ ഇവിടെ എഴുതുക: