പ്ലസ്ടൂ പൊളിറ്റിക്കൽ സയൻസ് പാഠപുസ്തകത്തിൽ തിരുത്തലുകൾ വരുത്തി എൻസിഇആർടി

പാഠപുസ്തകങ്ങളിൽ വീണ്ടും തിരുത്തലുകൾ വരുത്തി എൻസിഇആർടി. പ്ലസ്ടൂ പൊളിറ്റിക്കൽ സയൻസ് പുസ്തകത്തിലാണ് വീണ്ടും മാറ്റം വരുത്തിയിരിക്കുന്നത്. കശ്മീർ, ഇന്ത്യ-ചൈന അതിർത്തി പ്രശ്നങ്ങൾ, ഖലിസ്ഥാൻ എന്നീ പരാമർശങ്ങളിലാണ് പ്രധാനമായും മാറ്റം കൊണ്ടുവന്നിരിക്കുന്നത്.

ഇന്ത്യ – ചൈന ബന്ധം ദുർബലമായതിന് കാരണം പുസ്തകത്തിൽ പരാമർശിച്ചിട്ടുണ്ട്. ചൈനയുടെ പ്രകോപനമാണ് ഇരു രാജ്യങ്ങളുടെയും ബന്ധം ശക്തമാകാത്തതിന് കാരണമെന്നാണ് പുതുതായി ചേർത്തിരിക്കുന്നത്. മുമ്പ് ഇന്ത്യ-ചൈന രാജ്യങ്ങൾക്ക് സൈനിക സംഘർഷം എന്നി നിലയിലായിരുന്നു രേഖപ്പെടുത്തിയിരുന്നത്.

കൂടാതെ ആസാദ് പാകിസ്താൻ എന്ന പരാമർശവും നീക്കിയിട്ടുണ്ട്. പാക് അധീന കശ്മീർ പരാമർശിക്കുന്ന ഭാഗത്താണ് ആസാദ് പാകിസ്താൻ എന്ന് പരാമർശമുള്ളത്. ഇത് വിവാദത്തിന് കാരണമായതിനെ തുടർന്നാണ് ഒഴിവാക്കിയത്. പാക് അധീന ജമ്മു കശ്മീർ എന്നാണ് പുതിയ സിലബസിൽ ഉൾപ്പെടുത്തിയിരിക്കുന്നത്.

അനന്ദ്പൂർ സാഹിബ് പ്രമേയത്തെക്കുറിച്ചുള്ള പാഠഭാഗങ്ങളിലെ ഖാലിസ്ഥാൻ പരാമർശവും നീക്കം ചെയ്തു. ഇന്ത്യൻ ജനാധിപത്യത്തിന്റെ അതിജീവനത്തെ സംബന്ധിച്ചുള്ള കാർട്ടൂണുകളും പാഠപുസ്തകത്തിൽ നിന്ന് നീക്കി. 2014-ന് മുമ്പുള്ള ഇന്ത്യയുടെ അവസ്ഥ മോശമായി ചിത്രീകരിക്കുന്നതാണ് പഴയ പുസ്തകമെന്നും ഇതിനാലാണ് മാറ്റം വരുത്തുന്നതെന്നുമാണ് എൻ.സി.ഇ.ആർ.ടി നൽകിയ വിശദീകരണം.