കൊച്ചി: നടിയെ ആക്രമിച്ച കേസില് മെമ്മറി കാര്ഡ് നിയമവിരുദ്ധമായി ഉപയോഗിച്ചെന്നാരോപിച്ച് അതിജീവിത ഹൈക്കോടതിയില് ഹര്ജി സമര്പ്പിച്ചു.
അന്വേഷണ റിപ്പോര്ട്ടിലെ മൊഴിപ്പകര്പ്പ് നല്കണമെന്നു ഹര്ജിയില് ആവശ്യപ്പെട്ടു. അതിജീവിത സമര്പ്പിച്ച അപേക്ഷ വിചാരണ കോടതി തള്ളിയതോടെയാണ് ഹൈക്കോടതിയില് ഹര്ജി സമര്പ്പിച്ചത്. പ്രതി ദിലീപിനെ എതിര്കക്ഷി സ്ഥാനത്ത് നിന്ന് മാറ്റണമെന്നും ഹര്ജിയില് ആവശ്യമുണ്ട്. തനിക്ക് ലഭിക്കേണ്ട നിയമപരമായ അവകാശത്തെ ദിലീപ് എതിര്ക്കുന്നുവെന്നും മെമ്മറി കാര്ഡ് അന്വേഷണത്തില് ദിലീപ് കക്ഷി ആകേണ്ടതില്ലെന്നും അതിജീവിത പറയുന്നു.
മെമ്മറി കാര്ഡ് അന്വേഷണത്തില് രൂക്ഷ വിമര്ശനമാണ് അതിജീവിത ഉന്നയിക്കുന്നത്. മെമ്മറി കാര്ഡ് അന്വേഷണം ഹൈക്കോടതി ഉത്തരവിന്റെ ലംഘനമാണ്. അന്വേഷണത്തില് തന്റെ ഭാഗം കേട്ടില്ല. അന്വേഷണ റിപ്പോര്ട്ട് ഞെട്ടിക്കുന്നതും വേദനിപ്പിക്കുന്നതുമാണ്. ഹൈക്കോടതി മാര്ഗ നിര്ദേശങ്ങള് ലംഘിച്ചത് ബോധപൂര്വ്വമെന്നും ഇത് കോടതി അലക്ഷ്യമെന്നും അതിജീവിത ഹര്ജിയില് പറയുന്നു.
