തൃശൂര്‍: മുസ്ലിം പള്ളിയില്‍ കയറി നോമ്പ് തുറന്ന് നടന്‍ സുരേഷ് ഗോപി. പള്ളിയിലേക്ക് കയറാനായി കാറില്‍ നിന്നിറങ്ങിയ സുരേഷ് ഗോപി ആദ്യം ചോദിക്കുന്നത് ‘നോമ്പുതുറ കഴിഞ്ഞോ?’ എന്നാണ്. ഇല്ല എന്ന് പറഞ്ഞ് പള്ളി നിവാസികള്‍ അദ്ദേഹത്തെ പള്ളിയ്‌ക്കുള്ളിലെ ഉസ്താദിന്റെ മുറിയിലേക്ക് കൂട്ടിക്കൊണ്ടുപോയി.
ഒട്ടേറെപ്പേര്‍ അദ്ദേഹത്തെ സ്വീകരിക്കാന്‍ കാത്ത് നിന്നിരുന്നു. പിന്നീട് കസവ് മുണ്ട് നല്‍കി സ്വീകരിച്ചശേഷം പള്ളിയുടെ കമ്മിറ്റി അംഗങ്ങളെയെല്ലാം സുരേഷ് ഗോപിയ്‌ക്ക് പരിചയപ്പെടുത്തിക്കൊടുക്കുന്നത് കാണാം. നോമ്പുകഞ്ഞിയല്ലേ എന്ന് സുരേഷ് ഗോപി ചോദിക്കുന്നത് കേള്‍ക്കാം. സുരേഷ് ഗോപി ഉസ്താദിന്റെ മുറിയിലേക്ക് നടക്കുമ്പോള്‍ പള്ളിമുറ്റത്ത് നിറയെപ്പേര്‍ നോമ്പുകഞ്ഞിയുമായി ഇരിക്കുന്നത് കാണാം.
സുരേഷ് ഗോപിയെ സ്നേഹത്തോടെയാണ് പള്ളിക്കാര്‍ ഉള്ളില്‍ വിളിച്ചിരുത്തുന്നത്. അതിന് മുന്‍പ് അദ്ദേഹം പൈപ്പിലെ വെള്ളത്തില്‍ ദേഹശുദ്ധി വരുത്തിയാണ് അകത്ത് കടക്കുന്നത്. എനിക്ക് നേര്‍ച്ച കഞ്ഞി മാത്രം മാതി എന്ന് പറഞ്ഞ സുരേഷ് ഗോപിയ്‌ക്ക് നോമ്പ് കഞ്ഞി കൊടുത്തു. ഒട്ടേറെപ്പേര്‍ സുരേഷ് ഗോപിയുടെ വീഡിയോ പകര്‍ത്തി. തണുത്ത വെള്ളം കുടിച്ച് ദാഹമകറ്റിയ ശേഷം പള്ളിക്കാര്‍ നല്‍കിയ നേര്‍ച്ചക്കഞ്ഞി കയ്യില്‍പിടിച്ച് പ്രാര്‍ത്ഥിച്ച ശേഷമാണ് സുരേഷ് ഗോപി കഴിക്കുന്നത്.
നാല് മണിക്കൂറിനുള്ളില്‍ ഒരു ലക്ഷത്തിലധികം പേരാണ് ഈ വീഡിയോ കണ്ടത്. ഇത്രയും സമയത്തിനുള്ളില്‍ ആയിരത്തില്‍പ്പരം കമന്‍റുകളും ഈ വീഡിയോയ്‌ക്ക് കിട്ടി.
പ്രതികരിക്കാൻ ഇവിടെ എഴുതുക: