പ്രണയത്തിന് കണ്ണും മൂക്കും ഇല്ല… പ്രണയത്തിന് എന്ത് പ്രായം… ഇനിയും പെണ്ണുകിട്ടാത്തവര്‍ക്കും സ്വപ്‌നം കാണാം… റീല്‍സില്‍ തിളങ്ങിയാല്‍ മതി. കാര്യം എന്താണെന്നാണോ.
ഇന്‍സ്റ്റഗ്രാം റീല്‍സുകള്‍ കണ്ട് പ്രണയം തോന്നിയ 80കാരനെ വിവാഹം ചെയ്ത് 34കാരി. ഈ വാര്‍ത്ത സമൂഹമാധ്യമങ്ങളും ആഘോഷിക്കുകയാണ്. മധ്യപ്രദേശിലെ അഗര്‍ മാല്‍വ ജില്ലയിലാണ് സംഭവം. മഹാരാഷ്‌ട്രയില്‍ നിന്നുള്ള ഷീലയും(34) മധ്യപ്രദേശിലെ മഗാരിയ ഗ്രാമത്തില്‍ നിന്നുള്ള ബാലുറാമും ആണ് വിവാഹം കഴിച്ചത്.
സോഷ്യല്‍ മിഡിയയില്‍ സജീവമായിരുന്ന ബാലുറാം തന്റെ സുഹൃത്തായ വിഷ്ണു ഗുജ്ജാറിന്റെ സഹായത്തോടെ ഇന്‍സ്റ്റഗ്രാം റീലുകള്‍ ചെയ്യാറുണ്ടായിരുന്നു. തമാശ റീലുകളായിരുന്നു കൂടുതലും. ഇത് കണ്ട് ഇഷ്ടപ്പെട്ട ഷീല ഇന്‍സ്റ്റഗ്രാം വഴി ബാലുറാമുമായി പരിചയപ്പെട്ടു. ഇത് പിന്നീട് പ്രണയത്തിലേക്കെത്തി.
ബാലുറാമിന് ഒരു മകനും മൂന്ന് പെണ്‍മക്കളുമുണ്ട്. ഓരോരുത്തരും വിവാഹിതരായി ഇപ്പോള്‍ വെവ്വേറെയാണ് താമസിക്കുന്നത്. ഭാര്യ മരിച്ചതോടെ ബാലുറാം വിഷാദത്തിലായിരുന്നു. ഈ സമയം ചായക്കടയിലായിരുന്നു ജോലി. സുഹൃത്തായ വിഷ്ണു ആണ് ബാലുറാമിനെ റീല്‍ ചെയ്യാന്‍ പ്രേരിപ്പിച്ചത്. തമാശകള്‍ ചെയ്ത് റീലിലൂടെ ബാലുറാം നിരവധി ഫോളേവേഴ്‌സിനെ നേടി. നാട്ടില്‍ ബാലുബാ എന്നാണ് അറിയപ്പെട്ടിരുന്നത്. ഇതിനിടെ പതിയെ വിഷാദാവസ്ഥയില്‍ നിന്ന് ബാലുറാം കരകയറിത്തുടങ്ങി.
ഷീലയുമായി പരിചയപ്പെട്ടതോടെ സ്മാര്‍ട്ട് ഫോണില്‍ ബാലുവിനെ ചാറ്റ് ചെയ്യാന്‍ സഹായിച്ചതും വിഷ്ണുവാണ്. പ്രണയം തുടങ്ങിയതോടെ ഷീല വീടുവിട്ടിറങ്ങി വന്നാണ് ബാലുവിനെ വിവാഹം കഴിച്ചത്. ആദ്യം വിവാഹം രജിസ്റ്റര്‍ ചെയ്യുകയും പിന്നീട് ക്ഷേത്രത്തില്‍ വച്ച് ആചാരപ്രകാരവും വിവാഹിതരായി.
പ്രതികരിക്കാൻ ഇവിടെ എഴുതുക: