കാസര്കോട്: നാമനിര്ദേശ പത്രിക സമര്പ്പിക്കാനുള്ള ടോക്കണിന് വേണ്ടി തര്ക്കം. ജില്ലാ സിവിൽ സ്റ്റേഷനിലെ ക്യൂവിൽ ആദ്യം നിന്ന തനിക്ക് ആദ്യത്തെ ടോക്കൺ നൽകിയില്ലെന്നാണ് യുഡിഎഫ് സ്ഥാനാര്ത്ഥിയും സിറ്റിങ് എംപിയുമായ രാജ്മോഹൻ ഉണ്ണിത്താന്റെ പരാതി. ഒമ്പത് മണിമുതല് ഭക്ഷണം കഴിക്കാതെ ക്യൂ നില്ക്കുകയാണ് താനെന്നും എന്നാല് അത് അവഗണിച്ചാണ് എല്ഡിഎഫ് പ്രതിനിധിക്ക് ടോക്കണ് കൊടുത്തതെന്നും രാജ്മോഹന് ഉണ്ണിത്താന് ആരോപിച്ചു.
രാജ്മോഹന് ഉണ്ണിത്താന് കളക്ടറുടെ ഓഫീസിന് മുന്നില് കുത്തിയിരുന്ന് പ്രതിഷേധിക്കുകയാണ്. കളക്ടര് പറഞ്ഞത് അനുസരിച്ചാണ് താന് ക്യൂ നിന്നത്. എന്നാല് നേരത്തെ എത്തിയിട്ടും പത്രിക നല്കാന് കഴിയുന്നില്ല. രഹസ്യമായാണ് ആദ്യമെത്തിയ ആള്ക്ക് ടോക്കണ് കൊടുത്തത്. രണ്ടാമത്തെത് വേണമെങ്കില് തരാമെന്നാണ് ഡിവൈഎസ്പി പറഞ്ഞത്. ആര്ക്ക് വേണം ഈ ഔദാര്യമെന്നും രാജ്മോഹന് ഉണ്ണിത്താന് ചോദിച്ചു. അതേസമയം തങ്ങള് ഏഴ് മണിക്ക് എത്തിയെന്നാണ് എല്ഡിഎഫ് പ്രതിനിധികളുടെ വാദം.
കളക്ടര് ചട്ടം ലംഘിച്ചെന്നും പക്ഷപാതപരമായി പ്രവര്ത്തിച്ചെന്നും രാജ്മോഹന് ഉണ്ണിത്താന് പറഞ്ഞു. ഡെപ്യൂട്ടി കളക്ടര്ക്കേ താന് ഇനി നാമനിര്ദേശ പത്രിക നല്കൂ. എല്ഡിഎഫ് സ്ഥാനാര്ത്ഥി എംവി ബാലകൃഷ്ണന് ഇവിടെ പത്രിക നല്കിക്കോട്ടെയെന്നും അദ്ദേഹം പറഞ്ഞു. അഭ്യാസമിറക്കേണ്ടെന്നും രാഷ്ട്രീയം കളിക്കാനാണെങ്കിൽ കളക്ടര് വേണ്ടല്ലോയെന്നും പറഞ്ഞ് രാജ്മോഹൻ ഉണ്ണിത്താൻ പ്രതിഷേധിക്കുകയായിരുന്നു.
സമീപത്തുണ്ടായിരുന്ന മുസ്ലിം ലീഗ് നേതാക്കളും പ്രതിഷേധത്തിൽ ഭാഗമായി. പോലീസ് ഇടപെട്ട് അനുനയത്തിന് ശ്രമിച്ചെങ്കിലും നടന്നില്ല. സിപിഎം ജില്ലാ സെക്രട്ടറിയുടെ ആക്ടിങ് ചുമതല വഹിക്കുന്ന സിഎച്ച് കുഞ്ഞമ്പുവും രാജ്മോഹൻ ഉണ്ണിത്താനോട് സംസാരിച്ചു. എന്നാൽ ഇതോടെ എകെഎം അഷ്റഫ് എംഎൽഎയെ ഒപ്പം കൂട്ടി യുഡിഎഫ് സ്ഥാനാര്ത്ഥി കളക്ടറുടെ ഓഫീസിന് മുന്നിൽ കുത്തിയിരുന്നു.
