അഹമ്മദാബാദ് : സണ്റൈസേഴ്സ് ഹൈദ്രാബാദിനെതിരെ ഗുജറാത്ത് ടൈറ്റന്സിന് മിന്നും വിജയം. 163 റണ്സ് വിജയ ലക്ഷ്യം 19.1 ഓവറില് 3 വിക്കറ്റ് നഷ്ടത്തിലാണ് മറികടന്നത്.
വൃദ്ധിമന് സാഹ പതിമൂന്ന് പന്തില് 25 റണ്സ് നേടി ശുഭ്മന് ഗില്, സായി സുദര്ശന് എന്നിവരും നന്നായി ബാറ്റ് വീശിയപ്പോള് ഗുജറാത്തിന് വിജയം എളുപ്പമായി.
ഒന്നാം വിക്കറ്റില് സാഹയും ഗില്ലും ചേര്ന്ന് 4.1 ഓവറില് 36 റണ്സ് നേടി. രണ്ടാം വിക്കറ്റില് ഗില്ലും സായി സുദര്ശനും 38 റണ്സ് കൂടി കൂട്ടിച്ചേര്ത്തു. ഗില് 28 പന്തില് 36 റണ്സ് നേടി പുറത്തായി. പിന്നാലെ സായി സുദര്ശനും ഡേവിഡ് മില്ലറും ചേര്ന്ന് നേടിയ 64 റണ്സാണ് ടീമിനെ വിജയത്തിലേക്ക് നയിച്ചത്.
അവസാന അഞ്ചോവറില് 49 റണ്സായിരുന്നു ഗുജറാത്തിന് വേണ്ടിയിരുന്നത്. മയാംഗ് മാര്ക്കണ്ടേ എറിഞ്ഞ 16ാം ഓവറില് ഡേവിഡ് മില്ലര് ഒരു ഫോറും ഒരു സിക്സും നേടിയപ്പോള് സായി സുദര്ശനും സിക്സര് പറത്തി. ഓവര് പൂര്ത്തിയാകും മുമ്പ് മില്ലര് ഒരു സിക്സ് കൂടി നേടി. ഈ ഓവറില് നിന്ന് 24 റണ്സ് പിറന്നപ്പോള് ലക്ഷ്യം 24 പന്തില് 25 റണ്സായി .
എന്നാല് സണ്റൈസേഴ്സ് നായകന് പാറ്റ് കമ്മിന്സ് ബൗള് ചെയ്യാനെത്തിയതോടെ 36 പന്തില് 45 റണ്സ് നേടിയ സായി സുദര്ശന്റെ വിക്കറ്റ് ഗുജറാത്തിന് നഷ്ടമായി. പിന്നാലെ കമ്മിന്സിനെ രണ്ട് ബൗണ്ടറികള് പായിച്ച് മില്ലര് അവസാന മൂന്നോവറിലെ ലക്ഷ്യം 16 റണ്സാക്കി മാറ്റി. 18ാം ഓവറില് വിജയ് ശങ്കറും തുടരെ ബൗണ്ടറികളുമായി രംഗത്തെത്തിയപ്പോള് ഗുജറാത്തിന് വിജയം ഏറെ അടുത്തായി.
18 പന്തില് 30 റണ്സിന്റെ കൂട്ടുകെട്ടാണ് മില്ലറും വിജയ് ശങ്കറും നാലാം വിക്കറ്റില് നേടിയത്. മില്ലര് 27 പന്തില് 44 റണ്സ് നേടി. വിജയ് ശങ്കര് 11 പന്തില് 14 റണ്സുമായി മില്ലര്ക്ക് മികച്ച പിന്തുണ നല്കി.
