കാസര്കോട്: ഉപ്പള ടൗണിലെ എടിഎമ്മില് നിറയ്ക്കാന് പണവുമായി എത്തിയ വാഹനത്തിന്റെ ചില്ലു തകര്ത്ത് അരക്കോടി രൂപ പട്ടാപ്പകല് കവര്ച്ച ചെയ്ത കേസില് പോലീസ് അന്വേഷണം തുടരുന്നു. ഇതുവരെ വ്യക്തമായ വിവരമൊന്നും ലഭിച്ചിട്ടില്ല.
അന്വേഷണത്തിന്റെ ഭാഗമായി അന്യസംസ്ഥാന തൊഴിലാളികളും മറ്റും താമസിക്കുന്ന സ്ഥലങ്ങളില് പോലീസ് പരിശോധന നടത്തി. ബുധനാഴ്ച വൈകുന്നേരം ആരംഭിച്ച പരിശോധന ഇന്നലെ വെളുപ്പിനു വരെ നീണ്ടു. സിസിടിവി ക്യാമറയില് പതിഞ്ഞ ആളെക്കുറിച്ചുള്ള വിവരത്തിനാണ് ശ്രമം. ബുധനാഴ്ച ഉച്ചയ്ക്കാണ് കവര്ച്ച നടന്നത്.
ഉപ്പള ടൗണിലെ ആക്സിസ് ബാങ്കിന്റെ എടിഎമ്മില് നിറയ്ക്കുന്നതിന് പണവുമായി എത്തിയതായിരുന്നു മുംബൈയിലെ സ്വകാര്യ ഏജന്സിയുടെ വാഹനം. വാഹനത്തിലെ ഒരു ബാഗില് ഉണ്ടായിരുന്ന 70 ലക്ഷം രൂപയില് നിന്നു 20 ലക്ഷം രൂപ എടിഎമ്മില് നിറയ്ക്കാനായി രണ്ടു ജീവനക്കാര് കൊണ്ടുപോയി. അവശേഷിച്ച 50 ലക്ഷം രൂപ അടങ്ങിയ ബാഗ് പിന്സീറ്റില് വച്ചിരുന്നുവെന്നാണ് പണം എത്തിക്കുന്നതിന്റെ ചുമതല ഉണ്ടായിരുന്ന ഉളിയത്തടുക്കയിലെ ജിതേന്ദ്ര പോലീസിനു നല്കിയ മൊഴി. എടിഎമ്മില് പണം നിക്ഷേപിച്ച് 10 മിനിറ്റിനകം ജീവനക്കാര് തിരിച്ചെത്തിയപ്പോഴാണ് പണം കവര്ച്ച ചെയ്ത വിവരം അറിഞ്ഞത്. പോലീസ് പരിശോധനയില് വാഹനത്തിന്റെ ചില്ല് തകര്ക്കുന്നതിന്റെയും പണം കൈക്കലാക്കുന്നതിന്റെയും ദൃശ്യങ്ങള് ലഭിച്ചു.
കവര്ച്ചാ സംഘത്തില് മൂന്നു പേര് ഉണ്ടായിരുന്നതായി സംശയിക്കുന്നു. ഒരാള് ചില്ല് തകര്ത്ത് പണം കൈക്കലാക്കിയെന്നും രണ്ടാമന് വഴിയില് വച്ച് പണമടങ്ങിയ ബാഗ് ഏറ്റുവാങ്ങിയെന്നും മറ്റൊരാള് ബ്രീസാ കാറുമായി അല്പം അകലെ കാത്തിരുന്നുവെന്നുമാണ് പോലീസിന്റെ സംശയം.
പണം കൊണ്ടുപോയതില് സുരക്ഷാവീഴ്ച്ച ഉണ്ടായതുപോലെ സംഭവം നടന്നതിന് ശേഷം പോലീസിനും സുരക്ഷാ വീഴ്ച്ച ഉണ്ടായതായി ആരോപണം ഉയര്ന്നിട്ടുണ്ട്. സംഭവം നടന്ന ഉടന് ദേശീയപാതയും കര്ണാടകയിലേക്കുള്ള റോഡുകളും അടച്ച് വാഹന പരിശോധന നടത്തിയിരുന്നുവെങ്കില് കവര്ച്ചക്കാരെ പിടികൂടാന് കഴിയുമായിരുന്നുവെന്ന് നാട്ടുകാര് ചൂണ്ടിക്കാട്ടുന്നു. പണം കൊള്ളയടിച്ച സംഘം കര്ണാടകയിലേയ്ക്ക് കടന്നതായി സംശയിക്കുന്നു. അതിനാല് മോഷ്ടാക്കളെ കണ്ടെത്താന് കര്ണാടക പോലീസിന്റെ സഹായവും തേടിയിട്ടുണ്ട്. സംഭവത്തില് ദുരൂഹത ഉയര്ന്നിട്ടുണ്ട്. സുരക്ഷാ ജീവനക്കാര് ഇല്ലാത്തതാണ് ദുരൂഹതയ്ക്ക് കാരണം.
