തിരുവനന്തപുരം: കേരളസര്വകലാശാലയില് നിന്ന് വിരമിച്ച ഉദ്യോഗസ്ഥന് സര്വകലാശാലയ്ക്ക് നല്കാനുള്ളത് ഒന്നരക്കോടിയോളം രൂപ. തലസ്ഥാനത്തെ പ്രമുഖനായ ഒരു സിപിഎം നേതാവായ മുന്മന്ത്രിയുടെ അടുത്തയാളായതുകൊണ്ട് പണം തിരിച്ചു പിടിക്കുന്നതില് സര്വകലാശാലയ്ക്ക് മെല്ലെപ്പോക്ക്.
സര്വകലാശാല ജോയിന്റ് രജിസ്ട്രാറായി വിരമിച്ച ഡോ.പി. രാഘവനാണ് ഒന്നരക്കോടിയോളം രൂപ നല്കാനുള്ളത്. ഇയാള് വിരമിച്ചിട്ട് മൂന്ന് വര്ഷത്തോളമായിട്ടും തുക തിരിച്ചു പിടിക്കാനുള്ള ഒരു നടപടിയും സ്വീകരിച്ചിട്ടില്ല.
യൂണിവേഴ്സിറ്റിയിലെ കേരളാ എംപ്ലോയീസ് കോ-ഓപ്പറേറ്റീവ് സോസൈറ്റിയില് നിന്നും കേരള യൂണിവേഴ്സിറ്റി സ്റ്റാഫ് ഹൗസിങ് കോ-ഓപ്പറേറ്റീവ് സൊസൈറ്റിയില് നിന്നും എടുത്ത വായ്പകളില് പതിമൂന്ന് ലക്ഷത്തോളം രൂപ തിരിച്ചടയ്ക്കാനുണ്ട്. കൂടാതെ ഇയാളുടെ സര്വീസ് അക്കൗണ്ടില് രജിസ്ട്രാര് അവധിയിലായപ്പോള് 1,36,79000 മാറ്റിയിരുന്നു. ഈ തുക ചെലവഴിച്ചതിന്റെ കണക്കും നല്കിയിട്ടില്ല. ഇത് ഡോ. രാഘവന്റെ ബാധ്യതയിലാണെന്നാണ് സര്വകലാശാല രേഖകളില്. ബാധ്യത ഉള്ളതിനാല് മുഴുവന് പ്രൊവിഷണല് പെന്ഷനാണ് ഇയാള്ക്ക് നല്കി വരുന്നത്. ആനുകൂല്യങ്ങളും നല്കുന്നില്ല. ഇതോടെ നേതാവ് ഇടപെട്ട് ഇയാളെ കാമ്പസിലെ ഹരിതം പദ്ധതിയുടെ കോ ഓര്ഡിനേറ്ററായി നിയമിച്ചു.
യൂണിവേഴ്സിറ്റിക്ക് ഇത്രയധികം ബാധ്യത വരുത്തിയ ഇയാള് ഇപ്പോഴും അവിടെ നിന്ന് ശമ്പളം വാങ്ങുന്നത് നിയമ വിരുദ്ധമാണ്. സര്വകലാശാല വളപ്പില്നിന്നും മരം മുറിച്ച വകയില് കോടികള് നല്കാനുമുണ്ട്. കാര്യവട്ടം കാമ്പസിലെ മലയാളം ഡിപ്പാര്ട്ട്മെന്റിന്റെ മുന്വശത്ത് നിന്ന വനംവകുപ്പിന്റെ വനവല്ക്കരണത്തിനായി ഹരിതം പദ്ധതിയില്പ്പെടുത്തി നട്ടു വളര്ത്തിയ തേക്ക്, ഈട്ടി, മഹാഗണി തുടങ്ങിയ വര്ഷങ്ങളുടെ പഴക്കമുള്ള വന് മരങ്ങളാണ് മുറിച്ചത്. പത്ത്കോടി രൂപ വിലവരുന്ന മരങ്ങളാണ് ഇയാളുടെ നേതൃത്വത്തില് മുറിച്ച് കടത്തിയതെന്ന് മറ്റ് ജീവനക്കാര് ആരോപിക്കുന്നു.
തൃപ്പാദപുരം മഹാദേവക്ഷേത്തില് ഇയാള് പ്രസിഡന്റായിരുന്ന കാലഘട്ടത്തില് നടത്തിയ സാമ്പത്തിക തിരിമറിയില് ഹൈക്കോടതി ഡിവിഷന് ബഞ്ചിന്റെ ഉത്തരവ് പ്രകാരം ദേവസ്വം വിജിലന്സ് അന്വേഷണം നടക്കുകയാണ്. അന്വേഷണത്തില് ഇതുവരെ കണ്ടെത്തിയത് ഒരുകോടി അന്പത്തിമൂന്ന് ലക്ഷം രൂപയുടെ ക്രമക്കേട്. ക്ഷേത്രത്തിലെ സ്വര്ണ്ണം, വെള്ളി ആഭരണങ്ങളുടെ സ്റ്റോക്ക് രജിസ്റ്ററിലും തിരിമറി നടത്തിയ സംഭവം വിജിലന്സ് എസ്പി നേരിട്ട് അന്വേഷിക്കുന്നുണ്ട്. സ്വര്ണ്ണം, വെള്ളി ആഭരണങ്ങളില് കുറവ് വന്നിട്ടുണ്ടെന്ന പരാതിയില് ദേവസ്വം ബോര്ഡ് സീല് ചെയ്ത് കൊടുക്കുന്ന രസീത് കൂടാതെ ഉറപ്പ്ശീട്ട് എന്ന പേരില് ഇയാള് സ്വന്തമായി രസീത് അടിച്ച് വ്യാപകമായി ലക്ഷങ്ങളുടെ പണപ്പിരിവ് നടത്തിയതായും പരാതിയുണ്ട്. സിപിഎം മുന്മന്ത്രിയുടെ അടുപ്പക്കാരനായതിനാല് ദേവസ്വം ബോര്ഡ് ഒരു നടപടിയും സ്വീകരിച്ചിരുന്നില്ല. ഒടുവില് നാട്ടുകാര് കോടതിയില് പോയതോടെയാണ് നടപടിക്ക് ദേവസ്വം നിര്ബന്ധിതമായത്.
ജന്മഭൂമി ഓണ്ലൈന്