ലഖ്നൗ: ഉത്തര്പ്രദേശിലെ മീററ്റില് മൊബൈല് ഫോണ് ചാര്ജറില് നിന്ന് തീ പടര്ന്ന് നാലു കുട്ടികള്ക്ക് ദാരുണാന്ത്യം. ഷോര്ട്ട് സര്ക്യൂട്ടിനെ തുടര്ന്നുണ്ടായ തീപ്പിടിത്തത്തിലാണ് അപകടമെന്നാണു റിപ്പോര്ട്ട്. കുട്ടികളെ രക്ഷിക്കാന് ശ്രമിക്കുന്നതിനിടെ അച്ഛനമ്മമാര്ക്കും ഗുരുതരമായി പൊള്ളലേറ്റു.
ഖാലു (5), ഗോലു (6), നിഹാരിക (8), സരിക (12) എന്നീ കുട്ടികളാണ് മരിച്ചത്. കുട്ടികള് മുറിക്കുള്ളില് ഉറങ്ങുകയായിരുന്നു. അറുപതു ശതമാനത്തിലേറെ പൊള്ളലേറ്റ കുട്ടികളുടെ അമ്മ ബബിതയെ (35) ദല്ഹി എയിംസ് ആശുപത്രിയിലേക്ക് മാറ്റി. മീററ്റിലെ ആശുപത്രിയിലുള്ള പിതാവ് ജോണിയുടെ (39) ആരോഗ്യനിലയും ഗുരുതരമാണ്.
കിടക്കയിലേക്ക് അതിവേഗം തീപടര്ന്നതാണ് കുട്ടികളുടെ മരണത്തിന് ഇടയാക്കിയതെന്ന് പോലീസ് പറഞ്ഞു. ആശുപത്രിയില് എത്തിക്കും മുന്പു തന്നെ രണ്ടു കുട്ടികള് മരിച്ചിരുന്നു. രണ്ടു കുട്ടികള് ഇന്നലെ രാവിലെയാണ് മരിച്ചത്. തീപ്പിടിത്തമുണ്ടായ സമയത്ത് രക്ഷിതാക്കള് അടുക്കളയിലായിരുന്നു. ശബ്ദം കേട്ട് മുറിയിലേക്ക് ഓടിവന്നപ്പോള് കുട്ടികളുടെ ശരീരത്തില് തീപിടിക്കുന്നതാണു കണ്ടതെന്നു പോലീസ് വ്യക്തമാക്കി.
