മലയിന്കീഴ്: ‘ഇതെന്റെ രണ്ടാം ജന്മമാണ്…ഞാന് മുരളിയേട്ടന് ഫാന്…’ഖത്തറിലെ ജയിലില് നിന്നും വി.മുരളീധരന്റെയും കേന്ദ്ര സര്ക്കാരിന്റെയും ഇടപെടലിലൂടെ മോചിതനായ നാവിക സേനാ ഉദ്യോഗസ്ഥന് രാഗേഷ് ഗോപകുമാര് പറഞ്ഞുനിര്ത്തി. ഇന്നലെ നരുവാംമൂട് നടന്ന പദയാത്രയില് അമ്മ രമയ്ക്കൊപ്പം വി.മുരളീധരന് അഭിവാദ്യമര്പ്പിക്കാനെത്തിയതായിരുന്നു രാഗേഷ്.
ഫെബ്രുവരി 13 ന് ആണ് ഖത്തറിലെ ജയിലില് നിന്ന് മോചിതനായി നരുവാമൂട് ഇളമാനൂര്ക്കോണം ‘നിഹാര’ യില് എത്തിയത്. ഖത്തറില് വധശിക്ഷയും പിന്നീട് 25 വര്ഷത്തെ ജയില്വാസ വിധിയും വന്നതോടെ എല്ലാ പ്രതീക്ഷയും അസ്തമിച്ചു. അപ്പോഴാണ് വി.മുരളീധരന് ഇടപെടുന്നത്. എല്ലാ സഹായത്തിനും ബിജെപി നേതാക്കള് ഒപ്പം നിന്നു.
ജയില്മോചിതനായപ്പോള് ആദ്യം ശ്രമിച്ചതും വി.മുരളീധരനെ കാണാനായിരുന്നു. ഖത്തറില് വച്ചുതന്നെ നേരില്ക്കണ്ടു. അതിനുമുമ്പും ഖത്തറില് വച്ചും മുരളിയേട്ടനെ കണ്ടിട്ടുണ്ടെന്നും കാണാന് കിട്ടുന്ന അവസരങ്ങള് പാഴാക്കിയിട്ടില്ലെന്നും രാഗേഷ് പറഞ്ഞു. വി.മുരളീധരന് വിജയാംശകളും നേര്ന്നാണ് രാഗേഷും അമ്മയും മടങ്ങിയത്.
