കോഴിക്കോട്: ഐ ലീഗില്‍ ഗോകുലം കേരള എഫ്‌സിക്ക് വീണ്ടും തോല്‍വി. ഇന്നലെ നടന്ന കളിയില്‍ ദല്‍ഹിയോട് എതിരില്ലാത്ത രണ്ട് ഗോളുകള്‍ക്കാണ് സ്വന്തം തട്ടകമായ കോഴിക്കോട് കോര്‍പ്പറേഷന്‍ സ്റ്റേഡിയത്തില്‍ ടീം പരാജയപ്പെട്ടത്.
മത്സരത്തിന്റെ രണ്ടാം പകുതിയിലാണ് രണ്ട് ഗോളുകളും ദല്‍ഹി നേടിയത്. പകരക്കരാനായി ഇറങ്ങിയ സ്‌ട്രൈക്കര്‍ സെര്‍ജിയോ ബാര്‍ബോസ ഡാ സില്‍വ ജൂനിയര്‍ നേടിയ ഇരട്ടഗോളിലാണ് ദല്‍ഹി ഇന്നലെ വിജയിച്ചത്. 59, 87 മിനിറ്റുകളിലുമായിരുന്നു ഈ ഗോളുകള്‍. മത്സരത്തിന്റെ ആദ്യ പകുതിയില്‍ ഗോകുലം പ്രതിരോധ താരം മഷൂര്‍ ഷരീഫ് ചുവപ്പ് കാര്‍ഡ് കണ്ട് പുറത്തായതോടെ ടീം കളിയുടെ 39 മിനിറ്റ് മുതല്‍ പത്ത് പേരായി ചുരുങ്ങി. ഇതിന്റെ ക്ഷീണം പിന്നീട് കളിയലുടനീളം ടീമിന്റെ പ്രകടനത്തെ ബാധിച്ചു. പട്ടികയില്‍ 36 പോയിന്റുമായി അഞ്ചാം സ്ഥാനത്താണ് ഗോകുലം.
ലീഗില്‍ ഇന്നലെ നടന്ന ആദ്യ മത്സരത്തില്‍ കരുത്തരായ മുഹമ്മദന്‍ എസ് സിയെ റിയല്‍ കശ്മീര്‍ സമനിലയില്‍ തളച്ചു. ഇരുവരും ഗോള്‍ രഹിത സമനിലയില്‍ പിരിയുകയായിരുന്നു. സമനില പിണഞ്ഞതോടെ ചാമ്പ്യന്‍ഷിപ്പിലേക്ക് കുതിക്കുന്ന മുഹമ്മദന്‍ എസ് സിയുടെ കാത്തിരിപ്പും നീളുകയാണ്.
പ്രതികരിക്കാൻ ഇവിടെ എഴുതുക: