ധോണിക്ക് പകരം ചെന്നൈ സൂപ്പര്‍ കിംഗ്‌സിനെ നയിക്കാന്‍ ഋതുരാജ് ഗെയ്ക് വാദ്

ചെന്നൈ: വെളളിയാഴ്ച തുടങ്ങുന്ന ഐപിഎല്ലില്‍ ചെന്നൈ സൂപ്പര്‍ കിംഗ്‌സിനെ ഇത്തവണ നയിക്കുക ഋതുരാജ് ഗെയ്ക വാദ്. എം എസ് ധോണിക്ക് പകരമാണ് ഋതുരാജ് എത്തുന്നത്.

ഇത് രണ്ടാം തവണയാണ് ധോണി ചെന്നൈ സൂപ്പര്‍ കിംഗ്‌സിന്റെ നായകസ്ഥാനം കൈമാറുന്നത്. 2022ല്‍ രവീന്ദ്ര ജഡേജക്ക് ക്യാപ്റ്റന്‍ സ്ഥാനം കൈമാറിയെങ്കിലും ചെന്നൈ സൂപ്പര്‍ കിംഗ്‌സിന്റെ തുടര്‍ തോല്‍വികളുടെ പശ്ചാത്തലത്തില്‍ സീസണിനിടെ വീണ്ടും ധോണി ക്യാപ്റ്റന്‍ സ്ഥാനം ഏറ്റെടുത്തിരുന്നു.

കഴിഞ്ഞ സീസണില്‍ കാല്‍മുട്ടില്‍ പരിക്കേറ്റിട്ടും ചെന്നൈയെ നയിച്ചിറങ്ങിയ ധോണി അവര്‍ക്ക് അഞ്ചാം ഐപിഎല്‍ കിരീടം സമ്മാനിച്ചു. ആരാധകര്‍ അമ്പരപ്പോടെയാണ് ധോണി നയിക്കാനില്ലെന്ന അപ്രതീക്ഷിത തീരുമാനം കേട്ടത്.

2010, 2011, 2018, 2021, 2023 സീസണുകളില്‍ ചെന്നൈ ഐപിഎല്‍ കിരീടം നേടുമ്പോള്‍ ധോണിയായിരുന്നു ക്യാപറ്റന്‍. ഇന്ന് ചെന്നൈയില്‍ നടന്ന ഐപിഎല്‍ ടീം ക്യാപ്റ്റന്മാരുടെ ഫോട്ടോ ഷൂട്ടിലാണ് ചെന്നൈയുടെ ക്യാപ്റ്റനായി യുവ ഓപ്പണര്‍ ഋതുരാജ് ഗെയ്ക്വാദിനെ അവതരിപ്പിച്ചത്.

മുംബൈ ഇന്ത്യന്‍സ് നായകസ്ഥാനത്തു നിന്ന് നേരത്തേ രോഹിത് ശര്‍മയെയും നേരത്തെ മാറ്റിയിരുന്നു.ഹാര്‍ദ്ദിക് പാണ്ഡ്യയാണ് ഇത്തവണ മുംബൈയെ നയിക്കുന്നത്.