വോട്ടർ ഐഡിയും ആധാർ കാർഡും തമ്മിൽ ഇനിയും ലിങ്ക് ചെയ്തില്ലേ?

ന്യൂഡൽഹി: രാജ്യത്തെ പൗരന്റെ പ്രധാന തിരിച്ചറിയൽ രേഖകളിലൊന്നാണ് ആധാർ കാർഡ്. ഇപ്പോഴിതാ തിരഞ്ഞെടുപ്പ് അടുക്കുമ്പോൾ പൗരൻ കൃത്യമായി സൂക്ഷിക്കേണ്ട രേഖയാണ് വോട്ടർ ഐഡി. ബാങ്ക് അക്കൗണ്ട് തുറക്കൽ, സ്‌കൂൾ-കോളേജ് പ്രവേശനം, സ്‌കോളർഷിപ്പ്, ഡ്രൈവിംഗ് ലൈസൻസ് എന്നിങ്ങനെ നിരവധി ആവശ്യങ്ങൾക്ക് ഇവ ഉപയോഗിക്കാറുണ്ട്. ഇവ രണ്ടും തമ്മിൽ ബന്ധിപ്പിക്കേണ്ട പ്രാധാന്യത്തെക്കുറിച്ച് പലർക്കും ധാരണയുണ്ടാകില്ല. വോട്ടർ ഐഡി കാർഡുമായി ആധാർ നമ്പർ ലിങ്ക് ചെയ്യുന്നത് ഒരു വ്യക്തിയുടെ പേരിലുള്ള വ്യാജ വോട്ടർ ഐഡി കാർഡുകൾ ഇല്ലാതാക്കും. ആധാർ കാർഡും വോട്ടർ ഐഡിയും തമ്മിൽ ബന്ധിപ്പിക്കുന്നതിനുള്ള മാർഗ്ഗങ്ങൾ ഇവ…

ആധാർ നമ്പറുമായി വോട്ടർ ഐഡി ലിങ്ക് ചെയ്യേണ്ടത് ഇങ്ങനെ…

സ്റ്റെപ്പ് 1:

നാഷണൽ വോട്ടർ സർവീസ് പോർട്ടലിന്റെ ഔദ്യോഗിക വെബ്സൈറ്റ് https://voters.eci.gov.in/ സന്ദർശിക്കുക.

സ്റ്റെപ്പ് 2:

രജിസ്റ്റർ ചെയ്തിട്ടുണ്ടെങ്കിൽ ഉപയോക്താക്കൾക്ക് മൊബൈൽ നമ്പറും പാസ്വേഡും ക്യാപ്ച കോഡും നൽകി ‘ലോഗിൻ’ ക്ലിക്ക് ചെയ്യുക

സ്റ്റെപ്പ് 3:

രജിസ്റ്റർ ചെയ്തിട്ടില്ലാത്ത പക്ഷം ‘സൈൻ അപ്പ്’ ഓപ്ഷനിൽ ക്ലിക്ക് ചെയ്ത് സ്വയം രജിസ്റ്റർ ചെയ്യുക

സ്റ്റെപ്പ് 4:

മൊബൈൽ നമ്പറും ക്യാപ്ച കോഡും നൽകി ‘OTP അയയ്‌ക്കുക’ എന്നതിൽ ക്ലിക്ക് ചെയ്യുക. OTP, ഉപയോക്താക്കളുടെ EPIC നമ്പർ, പാസ്വേഡ് എന്നിങ്ങനെ ആവശ്യമായ വിശദാംശങ്ങൾ നൽകി ‘രജിസ്റ്റർ’ ബട്ടണിൽ ക്ലിക്ക് ചെയ്യുക

സ്റ്റെപ്പ് 5:

രജിസ്ട്രേഷൻ പൂർത്തിയാക്കിയതിന് ശേഷം മൊബൈൽ നമ്പറും പാസ്വേഡും നൽകി ലോഗിൻ ചെയ്യുക

സ്റ്റെപ്പ് 6:

‘ഫോം 6B’ ക്ലിക്ക് ചെയ്ത് സംസ്ഥാനവും നിങ്ങളുടെ നിയമസഭ/പാർലമെന്ററി മണ്ഡലവും എന്ന ഓപ്ഷൻ തിരഞ്ഞെടുക്കുക

സ്റ്റെപ്പ് 7:

ഉപയോക്താക്കളുടെ വിശദാംശങ്ങൾ നൽകിയ ശേഷം OTP, ആധാർ നമ്പർ എന്നിവ നൽകി ‘പ്രിവ്യൂ’ ബട്ടണിൽ ക്ലിക്ക് ചെയ്യുക

സ്റ്റെപ്പ് 8:

എല്ലാ വിശദാംശങ്ങളും നൽകിയതിന് ശേഷം ‘സമർപ്പിക്കുക’ എന്ന ബട്ടണിൽ ക്ലിക്കുചെയ്യുക. ഉപയോക്താക്കൾക്ക് അവരുടെ അപേക്ഷ ട്രാക്ക് ചെയ്യുന്നതിന് ഒരു റഫറൻസ് നമ്പറും ലഭ്യമാകും.