കൊച്ചി: മോന്സണ് മാവുങ്കലിന്റെ പുരാവസ്തു തട്ടിപ്പ് കേസില് അന്വേഷണ ഉദ്യോഗസ്ഥനായ ഡിവൈഎസ്പി വൈ.ആര്. റസ്റ്റത്തിനെതിരെ പരാതിക്കാര്. മോന്സണ് മാവുങ്കലുമായുള്ള ഇടപാടില് ഹവാല പണം ഉപയോഗിച്ചെന്ന ആരോപണം തെറ്റാണ്. ഹവാല പണമാണെന്ന് തെളിയിക്കാന് ഡിവൈഎസ്പിയെ വെല്ലുവിളിക്കുന്നുവെന്നും പരാതിക്കാര് പറഞ്ഞു.
മോന്സണ് നല്കിയ പണത്തിന് ബാങ്ക് രേഖയുണ്ട്. ഡിവൈഎസ്പിക്കെതിരായ എല്ലാ തെളിവുകളും ഇ ഡിക്ക് കൈമാറുമെന്നും പരാതിക്കാര് കൂട്ടിച്ചേര്ത്തു. ഡിവൈഎസ്പി റസ്റ്റത്തിന്റെ ആരോപണം പരാതിക്കാരെ ഭിന്നിപ്പിക്കാന് വേണ്ടിയാണെന്നും പരാതിക്കാര് ആരോപിച്ചു.
മോന്സണ് മാവുങ്കലിന് പരാതിക്കാര് നല്കിയത് ഹവാല പണമാണെന്നായിരുന്നു ഡിവൈഎസ്പിയുടെ ആരോപണം. മോന്സണിന്റെ കള്ളപ്പണം പണം കണ്ടെത്താന് കഴിയില്ലെന്ന് ക്രൈംബ്രാഞ്ച് വ്യക്തമാക്കുന്നു. ക്രൈംബ്രാഞ്ച് അന്വേഷത്തില് വിശ്വാസമില്ലെന്നും സിബിഐ അന്വേഷണം അനിവാര്യമാണെന്നും പരാതിക്കാര് പറയുന്നു.
ക്രൈംബ്രാഞ്ച് ഡിവൈസ്പി റസ്റ്റം 2021 നവംബറില് അനുമോള്, ലിജോ എന്നിവരുടെ അക്കൗണ്ടിലൂടെ രണ്ടു തവണയായി 25,000 രൂപയും ഒരു ലക്ഷം രൂപ നേരിട്ടും കൈപ്പറ്റി എന്നാണ് പുരാവസ്തു തട്ടിപ്പ് കേസിലെ പരാതിക്കാരനായ യാക്കൂബിന്റെ പരാതി.
അന്വേഷണം നടത്തണമെങ്കില് പണം വേണമെന്ന് ഡിവൈഎസ്പി നിരന്തരം ആവശ്യപ്പെട്ടിരുന്നതായാണ് പരാതിയില് പറയുന്നത്. പണം നല്കിയിട്ടും അന്വേഷണത്തില് പുരോഗതിയില്ലാത്തത് ചോദ്യം ചെയ്തപ്പോള് ഫോണ് വഴി ഉദ്യോഗസ്ഥന് ഭീഷണിപ്പെടുത്തിയെന്ന ആക്ഷേപവും പരാതിക്കാര് ഉയര്ത്തിയിട്ടുണ്ട്.
