തിരുവനന്തപുരം: പൗരത്വ നിയമ ഭേദഗതിക്കെതിരെയുളള പ്രതിഷേധത്തില് സംസ്ഥാനത്ത് രജിസ്റ്റര് ചെയ്ത കൂടുതല് കേസുകള് പിന്വലിക്കാന് ജില്ലാ പൊലീസ് മേധാവിമാര്ക്ക് നിര്ദ്ദേശം. ആഭ്യന്തര സെക്രട്ടറി പുറപ്പെടുവിച്ച ഉത്തരവില് നേരത്തെ പിന്വലിക്കാന് ഉത്തരവിട്ട കേസുകളുമായി ബന്ധപ്പെട്ട അപേക്ഷകള് കോടതിയില് എത്തിയോ എന്ന് ഉറപ്പാക്കണെമന്നും നിര്ദ്ദേശമുണ്ട്.
പൗരത്വ ഭേദഗതി നിയമം സംസ്ഥാനത്ത് നടപ്പാക്കില്ലെന്ന നിലപാടിലാണ് മുഖ്യമന്ത്രിയും സംസ്ഥാന സര്ക്കാരും. അതിനിടെ പ്രതിപക്ഷത്ത് നിന്ന് സിഎഎ വിരുദ്ധ പ്രക്ഷോഭത്തില് കേസുകള് സംബന്ധിച്ച് ആരോപണവും വിമര്ശനവും വന്നു. ഈ സാഹചര്യത്തിലാണ് സംസ്ഥാന ആഭ്യന്തര വകുപ്പിന്റെ നടപടി. പൗരത്വ ഭേദഗതി നിയമത്തിനെതിരെ പ്രക്ഷോഭം നടത്തുമെന്നാണ് സിപിഎം അറിയിച്ചത്. തെരഞ്ഞെടുപ്പ് പ്രഖ്യാപിച്ചിരിക്കെ മുസ്ലീങ്ങളെ തെറ്റിദ്ധരിപ്പിച്ച് വോട്ട് നേടാമെന്ന കണക്കുകൂട്ടലിലാണിത്.
സിഎഎ വിരുദ്ധ പ്രക്ഷോഭങ്ങളുമായി ബന്ധപ്പെട്ട് കേരളത്തില് ആകെ 835 കേസുകളാണ് രജിസ്റ്റര് ചെയ്തത്. ഇവയില് നൂറില് താഴെ കേസുകള് പിന്വലിക്കാന് സംസ്ഥാന സര്ക്കാര് നേരത്തെ ആവശ്യപ്പെട്ടിരുന്നു. മറ്റുള്ള കേസുകളുടെ ഗൗരവം നോക്കി മുന്നോട്ട് പോകാനായിരുന്നു തീരുമാനം. എന്നാല് കേസുകള് പിന്വലിക്കാത്തത് ചൂണ്ടിക്കാട്ടി പ്രതിപക്ഷം വിമര്ശിച്ചതോടെയാണ് തിടുക്കത്തില് കേസുകള് പിന്വലിക്കാന് തീരുമാനം.
