കാലിഫോര്‍ണിയ: ഇന്ത്യന്‍ വെല്‍സ് ടെന്നിസ് വനിതാ സിംഗിള്‍സില്‍ ലോക ഒന്നാം നമ്പര്‍ താരം ഇഗ സ്വിയാറ്റെക്കിന്റെ എതിരാളി മരിയ സകറി. സെമിയില്‍ നിലവിലെ യുഎസ് ഓപ്പണ്‍ ജേതാവ് കോകോ ഗൗഫിനെ തോല്‍പ്പിച്ചാണ് സകറി ഫൈനലിലെത്തിയത്. ഭാരത സമയം തിങ്കളാഴ്ച പുലര്‍ച്ചെ 3.30നാണ് വനിതാ ഫൈനല്‍ നടക്കുക.
യുക്രെയന്‍ കാരി മാര്‍ത്ത കോസ്റ്റിയൂക്കിനെ സെമി പോരില്‍ നേരിട്ടുള്ള സെറ്റുകള്‍ക്ക് കീഴടക്കി പോളിഷ് താരം ഇഗ നേരത്തെ തന്നെ ഇന്ത്യന്‍വെല്‍സ് ഫൈനല്‍ ഉറപ്പിച്ചു. വെറും 65 മിനിറ്റുകൊണ്ട് ഇഗ മത്സരം പൂര്‍ത്തിയാക്കി. സ്‌കോര്‍: 6-2, 6-1
ഗ്രീക്ക് താരം സകറി കടുത്ത പോരാട്ടത്തിനൊടുവിലാണ് മൂന്നാം സീഡ് താരം ഗൗഫിനെ തോല്‍പ്പിച്ചത്. ആദ്യ സെറ്റിനിടയിലും രണ്ടാം സെറ്റിന്റെ തുടക്കത്തിലും മഴ
കളി തടസ്സപ്പെടുത്തിയിരുന്നു. സ്‌കോര്‍: 6-4, 6-7(5-7), 6-2നാണ് സകറി സെമി വിജയിച്ചത്.
ഇക്കൊല്ലത്തെ ആദ്യ കിരീടനേട്ടത്തിനായി സകറി ഇറങ്ങുമ്പോള്‍ ആഴ്‌ച്ചകള്‍ക്ക് മുമ്പ് നടന്ന ഖത്തര്‍ ഓപ്പണ്‍ സ്വന്തമാക്കിയ ആത്മവിശ്വാസത്തിലാണ് ഇഗ സ്വിയാറ്റെക്ക്. ഖത്തര്‍ ഓപ്പണ്‍ നേട്ടത്തിലൂടെയാണ് താരം നഷ്ടപ്പെട്ട ലോക ഒന്നാം നമ്പര്‍ പദവി തിരിച്ചുപിടിച്ചത്. ഈ ഫൈനല്‍ കൂടി ജയിച്ചാല്‍ ഇക്കൊല്ലം ഇഗയുടെ അക്കൗണ്ടിലെ രണ്ടാം കിരീടമായിരിക്കും ഇത്.
പ്രതികരിക്കാൻ ഇവിടെ എഴുതുക: