രഞ്ജിയില്‍ മുംബൈ മുത്തം

മുംബൈ: രഞ്ജി ട്രോഫി ക്രിക്കറ്റില്‍ മുംബൈ ചാമ്പ്യന്മാര്‍. ഫൈനലില്‍ വിദര്‍ഭയെ 169 റണ്‍സിന് തകര്‍ത്താണ് മുംബൈ രഞ്ജി ട്രോഫിയില്‍ മുത്തമിട്ടത്. 2015-16 സീസണുശേഷം ആദ്യമായാണ് മുംബൈയുടെ കിരീടധാരണം.

രഞ്ജി ട്രോഫിയില്‍ ഏറ്റവും കൂടുതല്‍ തവണ കിരീടം നേടിയ ടീമും മുംബൈ ആണ്. 48 തവണ ഫൈനലില്‍ കളിച്ച് അവര്‍ 42-ാം തവണയാണ് കിരീടം നേടുന്നത്. എട്ട് തവണ കി
രീടം നേടിയിട്ടുള്ള കര്‍ണാടക ആണ് രണ്ടാമത്.

രണ്ടാം ഇന്നിങ്‌സില്‍ 538 റണ്‍സ് വിജയലക്ഷ്യം തേടിയിറങ്ങിയ വിദര്‍ഭ അവസാന ദിവസം ആദ്യ സെഷനില്‍ അക്ഷയ് വാഡ്കറുടെ സെഞ്ചുറിയുടെയും ഹര്‍ഷ് ദുബെയുടെ അര്‍ധസെഞ്ചുറിയുടെയും കരുത്തില്‍ വിക്കറ്റ് നഷ്ടമില്ലാതെ 333 റണ്‍സിലെത്തിയെങ്കിലും ലഞ്ചിനുശേഷം വാഡ്കറും ദുബെയും മടങ്ങിയതോടെ 368 റണ്‍സിന് ഓള്‍ ഔട്ടായി. അവസാന അഞ്ച് വിക്കറ്റുകള്‍ വെറും 15 റണ്‍സിനിടെ വലിച്ചെറിഞ്ഞാണ് വിദര്‍ഭ ഫൈനലില്‍ ദയനീയ തോല്‍വി ഏറ്റുവാങ്ങിയത്. സ്‌കോര്‍ മുംബൈ 224, 418, വിദര്‍ഭ 105, 368.

അഞ്ചിന് 248 എന്ന നിലയില്‍ അവസാന ദിനമായ ഇന്നലെ ബാറ്റിങ് ആരംഭിച്ച വിദര്‍ഭ ആദ്യ സെഷനില്‍ വിക്കറ്റ് നഷ്ടമാവാതെ പിടിച്ചു നിന്നതോടെ അപ്രതീക്ഷിത വിജയം നേടുമെന്ന പ്രതീക്ഷ ഉണര്‍ത്തിയിരുന്നു. വാഡ്കറുടെ സെഞ്ചുറിയും (102) ദുബെയുടെ അര്‍ധസെഞ്ചുറിയും (65) ആണ് വിദര്‍ഭക്ക് പ്രതീക്ഷ നല്‍കിയത്. 130 റണ്‍സ് അഞ്ചാം വിക്കറ്റില്‍ ഇവര്‍ കൂട്ടിച്ചേര്‍ത്തു. എന്നാല്‍ ലഞ്ചിന് തൊട്ട് പിന്നാലെ വാഡ്കറെ തനുഷ് കൊടിയാന്‍ വിക്കറ്റിന് മുന്നില്‍ കുടുക്കി വിദര്‍ഭക്ക് ആദ്യ പ്രഹരമേല്‍പ്പിച്ചു. തൊട്ട് പിന്നാലെ ദുബെയെ തുഷാര്‍ ദേശ്പാണ്ഡെ ഷംസ് മുലാനിയുടെ കൈകളിലെത്തിച്ചതോടെ വിദര്‍ഭയുടെ പോരാട്ടം അവസാനിച്ചു.

അവസാന ഫസ്റ്റ് ക്ലാസ് മത്സരം കളിച്ച മുംബൈ പേസര്‍ ധവാല്‍ കുല്‍ക്കര്‍ണി ഉമേഷ് യാദവിനെ ക്ലീന്‍ ബൗള്‍ഡാക്കി വിരമിക്കല്‍ അവിസ്മരണീയമാക്കിയതോടെ ആഭ്യന്തര ക്രിക്കറ്റില്‍ ഒരിക്കല്‍ കൂടി മുംബൈ വമ്പ് കാട്ടി. കൂറ്റന്‍ വിജയലകഷ്യം തേടിയിറങ്ങിയ വിദര്‍ഭക്ക് നാലാം ദിനം കടുത്ത പ്രതിരോധവുമായി ക്രീസില്‍ നിന്ന മലയാളി താരം കരുണ്‍ നായരും വാഡ്കറും ചേര്‍ന്നാണ് എളുപ്പം ജയിക്കാമെന്ന മുംബൈയുടെ പ്രതീക്ഷകള്‍ തകര്‍ത്തത്. 220 പന്ത് നേരിട്ട കരുണ്‍ നായര്‍ മൂന്ന് ബൗണ്ടറികള്‍ മാത്രം നേടിയാണ് 74 റണ്‍സെടുത്ത് പുറത്തായിരുന്നു.

നാലു വിക്കറ്റ് വീഴ്‌ത്തിയ തനുഷ് കൊടിയാനും രണ്ട് വിക്കറ്റ് വീതം വീഴ്‌ത്തിയ തുഷാര്‍ ദേശ്പാണ്ഡെയും മുഷീര്‍ ഖാനുമാണ് മുംബൈക്കായി ബൗളിംഗില്‍ തിളങ്ങിയത്.
രണ്ടാം ഇന്നിങ്‌സില്‍ മുംബൈയ്‌ക്കായി സെഞ്ചുറി നേടിയ മുഷീര്‍ ഖാനാണ് ഫൈനലിലെ മാന്‍ ഓഫ് ദി മാച്ച്. ചാമ്പ്യന്‍ഷിപ്പിന്റെ താരമായി തനുഷ് കൊടിയാനും തെരഞ്ഞെടുക്കപ്പെട്ടു.