ആറാട്ടുപുഴ: ആറാട്ടുപുഴ പൂരത്തിന് പൂരപ്പാടം ഒരുങ്ങുന്നു. തേവര് റോഡിന്റെ ഇരുവശത്തുമുള്ള മുപ്പത് ഏക്കറിലധികം വിസ്തൃതിയിലുള്ള പൂരപ്പാടം ട്രാക്ടര് ഉപയോഗിച്ചു ഉഴുതുമറിക്കുന്ന ജോലികളാണ് ഇപ്പോള് പുരോഗമിച്ചു കൊണ്ടിരിക്കുന്നത്. പാടം ഉഴുതു മറിക്കുന്നതോടുകൂടി തറഞ്ഞു നില്ക്കുന്ന ഭൂമിയുടെ ഉപരിതലത്തിലുള്ള സുഷിരങ്ങള് തുറക്കുകയും ഈ സുഷിരങ്ങള് വഴി വെള്ളം ഭൂമിയുടെ അടിത്തട്ടിലേക്ക് ഇറങ്ങുകയും ചെയ്യും.
കാലം തെറ്റി വരുന്ന വേനല് മഴയിലും പൂരപ്പാടത്ത് വെള്ളക്കെട്ട് ഉണ്ടാകാതിരിക്കാനാണ് ഭൂമി ഉഴുതുമറിക്കുന്നത്. പൂരത്തിന്റെ പ്രധാന ആകര്ഷണവും ഭക്തിനിര്ഭരവുമായ കൂട്ടിയെഴുന്നെള്ളിപ്പ് നടക്കുന്നത് ഈ പാടത്ത് വെച്ചാണ്. തൃപ്രയാര് തേവര്, ഊരകത്തമ്മത്തിരുവടി, ചേര്പ്പ് ഭഗവതി, ചാത്തക്കുടം ശാസ്താവ്, തൊട്ടിപ്പാള് ഭഗവതി, നെട്ടിശ്ശേരി ശാസ്താവ്, പൂനിലാര്ക്കാവ് ഭഗവതി, കടുപ്പശ്ശേരി ഭഗവതി, ചാലക്കുടി പിഷാരിക്കല് ഭഗവതി എന്നീ ദേവീദേവന്മാരുടെ എഴുന്നെള്ളിപ്പുകള് നടക്കുന്നതും അടുത്ത വര്ഷത്തെ പൂരം തിയ്യതി വിളംബരം ചെയ്യുന്നതും തുടര്ന്ന് ദേവീദേവന്മാര് ആറാട്ടുപുഴ ശാസ്താവിനോടു ഉപചാരം ചൊല്ലുന്നതും ഈ പാടത്തു വെച്ചു തന്നെയാണ്.
ആറാട്ടുപുഴ ക്ഷേത്ര ഉപദേശക സമിതിയുടെ നേതൃത്വത്തിലാണ് പൂരപ്പാടം സജ്ജമാക്കുന്നത്. കൊടിയേറ്റം 17നും തിരുവാതിര വിളക്ക് 19 വെളുപ്പിനും പെരുവനം പൂരം 20നും ആറാട്ടുപുഴ തറക്കല് പൂരം 22 നും ആറാട്ടുപുഴ പൂരം 23 നുമാണ്.
