മലപ്പുറം: ആയുഷ് മിനിസ്ട്രിയുടെ കീഴിലുള്ള, ദല്ഹി ആസ്ഥാനമായി പ്രവര്ത്തിക്കുന്ന രാഷ്ട്രീയ ആയുര്വേദ വിദ്യാപീഠം പ്രഖ്യാപിച്ച ലൈഫ് ടൈം അച്ചീവ്മെന്റ് അവാര്ഡിന് കോട്ടയ്ക്കല് ആര്യവൈദ്യശാല മാനേജിങ് ട്രസ്റ്റിയും ചീഫ് ഫിസിഷ്യനുമായ ഡോ. പി.എം. വാരിയര് അര്ഹനായി.
ഭാരതത്തിനകത്തും പുറത്തും ആയുര്വേദത്തിന്റെ ഉന്നമനത്തിനും പ്രചാരണത്തിനുമായി ഡോ. വാരിയര് നടത്തുന്ന സമഗ്രസംഭാവനയെ മാനിച്ചാണ് ഈ അവാര്ഡ്. രാഷ്ട്രീയ ആയുര്വേദ വിദ്യാപീഠം നടത്തുന്ന ഗുരുശിഷ്യപരമ്പര എന്ന ഒരു വര്ഷ കോഴ്സിന്റെ കഴിഞ്ഞ 17 വര്ഷങ്ങളായുള്ള ഗുരുവാണ് ഡോ. പി.എം. വാരിയര്. രാജ്യത്തിന്റെ വിവിധ ഭാഗങ്ങളില് നിന്നുള്ള ആയുര്വേദ ഡോക്ടര്മാര്ക്ക് ശാസ്ത്രീയവും പ്രായോഗികവുമായ അനുഭവസമ്പത്ത് പകര്ന്ന് കൊടുക്കുക എന്നതാണ് ഈ കോഴ്സിന്റെ ലക്ഷ്യം.
ന്യൂദല്ഹിയിലെ ഡോ. അംബേദ്കര് ഇന്റര്നാഷണല് സെന്ററില് കേന്ദ്ര ആരോഗ്യക്ഷേമ മന്ത്രി ഡോ. മന്സൂഖ് മാണ്ഡവ്യയുടെ സാന്നിദ്ധ്യത്തില് പദ്മഭൂഷണ് വൈദ്യ ദേവേന്ദ്ര ത്രിഗുണ, ആയുഷ് സെക്രട്ടറി പദ്മശ്രീ രാജേഷ് കൊട്ടേച്ച, ആയുഷ് അഡൈ്വസര് വൈദ്യ മനോജ് നെസരി എന്നിവര് ചേര്ന്ന് പുരസ്കാര സമര്പ്പണം നടത്തി.
ആള് ഇന്ത്യാ ഇന്സ്റ്റിറ്റ്യൂട്ട് ഓഫ് ആയുര്വേദ ഡയറക്ടര് പ്രൊഫ. തനുജ നെസരി, രാഷ്ട്രീയ ആയുര്വേദ വിദ്യാപീഠം ഡയറക്ടര് വന്ദന ശിരോഹ എന്നിവര് പങ്കെടുത്തു.
