കല്പ്പറ്റ: പൂക്കോട് വെറ്ററിനറി കോളജ് വിദ്യാര്ത്ഥി സിദ്ധാര്ത്ഥനെ എസ്എഫ്ഐ അക്രമികള് ക്രൂരമര്ദനത്തിനിരയാക്കിയതിന്റെ കൂടുതല് വിവരങ്ങള് പുറത്ത്. കൊടും ക്രൂരതയാണ് എസ്എഫ്ഐക്കാര് സിദ്ധാര്ത്ഥനോടു ചെയ്തത്. മുഖ്യപ്രതികളിലൊരാളായ സിന്ജോയാണ് ഏറ്റവും ക്രൂരമായി മര്ദിച്ചത്. കരാട്ടെ ബ്ലാക്ക് ബെല്റ്റായ സിന്ജോ സിദ്ധാര്ത്ഥന്റെ കണ്ഠനാളം ഞെക്കിപ്പൊട്ടിച്ചു. ഇതോടെ ഒരു തുള്ളി വെള്ളം പോലുമിറക്കാന് സിദ്ധാര്ത്ഥനു കഴിഞ്ഞില്ല, പോലീസ് പറഞ്ഞു.
സിദ്ധാര്ത്ഥന് അനുഭവിച്ച കൊടിയ മര്ദനത്തെക്കുറിച്ച് വിദ്യാര്ത്ഥികള് പോലീസിനു മൊഴി നല്കി. ആള്ക്കൂട്ട വിചാരണയ്ക്കിടെ സിദ്ധാര്ത്ഥനെ ചവിട്ടി താഴെയിട്ടതും വയറില് തള്ളവിരല് ഉപയോഗിച്ച് കരാട്ടെ സ്റ്റൈലില് മര്ദിച്ചതും സിന്ജോയായിരുന്നു. സിദ്ധാര്ത്ഥന് വെള്ളം ചോദിച്ചപ്പോള് കൊടുത്തെങ്കിലും അതു കുടിക്കാന് സാധിച്ചില്ല. ആള്ക്കൂട്ട വിചാരണയ്ക്ക് പദ്ധതിയിട്ടതും എസ്എഫ്ഐ നേതാക്കളും സിന്ജോയും ചേര്ന്നാണ്.
ഈ സംഭവം പുറത്തുപറഞ്ഞാല് തലയുണ്ടാകില്ലെന്നു പറഞ്ഞ് ഭീഷണിപ്പെടുത്തി. മുഖ്യപ്രതികളില് രണ്ടാമനായ കാശിനാഥനും സിദ്ധാര്ത്ഥനെ ക്രൂരമായി മര്ദിച്ചിരുന്നു. ബെല്റ്റുകൊണ്ട് നിരവധി തവണ അടിച്ചത് കാശിനാഥനായിരുന്നു. മനോനില തെറ്റിയതു പോലെയാണ് സിദ്ധാര്ത്ഥനോട് പെരുമാറിയത്. കാശിനാഥന് കോളജില് അറിയപ്പെട്ടിരുന്നത് സൈക്കോ എന്ന പേരിലാണ്. ഇയാള് ലഹരിക്ക് അടിമയായിരുന്നു, വിദ്യാര്ത്ഥികള് കൂട്ടിച്ചേര്ത്തു.
