ചങ്ങനാശ്ശേരി: ബിഡിജെഎസ് സംസ്ഥാന പ്രസിഡന്റും എസ്എന്‍ഡിപിയോഗം വൈസ് പ്രസിഡന്റുമായ തുഷാര്‍ വെള്ളാപ്പള്ളി എന്‍എസ്എസ് ജനറല്‍ സെക്രട്ടറി ജി. സുകുമാരന്‍ നായരുമായി കൂടിക്കാഴ്ച നടത്തി. പെരുന്നയിലെ എന്‍എസ്എസ് ആസ്ഥാനത്ത് എത്തിയ തുഷാര്‍, സുകുമാരന്‍ നായരുമായി അര മണിക്കൂറോളം ചര്‍ച്ച നടത്തി. ഭാര്യ ആശാ തുഷാറും ഒപ്പമുണ്ടായിരുന്നു.
ബിഡിജെഎസിന് നല്‍കിയിട്ടുള്ള സീറ്റുകളിലെ സ്ഥാനാര്‍ത്ഥികളെ ഇന്ന് പ്രഖ്യാപിക്കുമെന്ന് തുഷാര്‍ പറഞ്ഞു. മാവേലിക്കര, കോട്ടയം, ചാലക്കുടി, ഇടുക്കി സീറ്റുകളാണ് ബിഡിജെഎസിന് നല്കിയിട്ടുള്ളത്. ഈ കാര്യത്തില്‍ എന്‍ഡിഎയില്‍ അഭിപ്രായ വ്യത്യാസമില്ലെന്നും അദ്ദേഹം പറഞ്ഞു.
പദ്മജ വേണുഗോപാലിനെപ്പോലെയുള്ള കോണ്‍ഗ്രസ് നേതാക്കള്‍ ഇനിയും ബിജെപിയിലേക്ക് വരും. പി.സി.ജോര്‍ജ്ജ് ബിജെപിയിലെത്തിയതിനെക്കുറിച്ച് ഒന്നും പറയാനില്ല. ഓരോരുത്തര്‍ക്കും അവരുടേതായ അഭിപ്രായമുണ്ട്. ദേശീയ ജനാധിപത്യ മുന്നണിയുടെ ഭാഗമാവുമ്പോള്‍ അതിലെ സ്ഥാനാര്‍ത്ഥികള്‍ക്ക് വേണ്ടി രംഗത്തിറങ്ങേണ്ടിവരുമെന്നും തുഷാര്‍ പറഞ്ഞു. ബിഡിജെഎസ് സംസ്ഥാന സെക്രട്ടറി സിനില്‍ മുണ്ടപ്പള്ളി, ജില്ലാവൈസ് പ്രസിഡന്റ് ശ്രീനിവാസന്‍ പെരുന്ന, പി.കെ. സുരേഷ് എന്നിവരും ഒപ്പമുണ്ടായിരുന്നു.
പ്രതികരിക്കാൻ ഇവിടെ എഴുതുക: