ഇനി കൊച്ചി മെട്രോ തൃപ്പൂണിത്തുറയിൽ നിന്ന്; പുതിയ സ്റ്റേഷന്റെ ഫ്‌ളാഗ് ഓഫ് കർമ്മം ഇന്ന്; പ്രധാനമന്ത്രി നിർവ്വഹിക്കും

എറണാകുളം: കൊച്ചി മെട്രോ സർവീസിന്റെ ഒന്നാം ഘട്ടത്തിലെ അവസാന സ്‌റ്റേഷനായ തൃപ്പൂണിത്തുറ ടെർമിനൽ ഉദ്ഘാടനം ഇന്ന്. പ്രധാനമന്ത്രി നരേന്ദ്രമോദി ഇന്ന് നാടിന് സമർപ്പിക്കും. രാവിലെ പത്ത് മണിയോടെയാണ് ഉദ്ഘാടന കർമ്മം നിർവ്വഹിക്കുക. കൊൽക്കത്തയിൽ നിന്ന് ഓൺലൈൻ മുഖേനയാകും പ്രധാനമന്ത്രി ഫ്‌ളാഗ് ഓഫ് കർമ്മം നിർവ്വഹിക്കുന്നത്.

ഇന്ന് ഉദ്ഘാടനശേഷം തൃപ്പൂണിത്തുറയിൽ നിന്ന് ദിവ്യാംഗരായ കുട്ടികളുമായി ആദ്യ ട്രെയിൻ ആലുവയിലേക്ക് പുറപ്പെടും. ആദ്യ ട്രെയിൻ പുറപ്പെട്ടതിന് ശേഷം പൊതുജനങ്ങൾക്കുള്ള സർവീസ് ആരംഭിക്കും.

ആലുവ മുതൽ തൃപ്പൂണിത്തുറ വരെ 25 സ്റ്റേഷനുകളുമായി 28.2 കിലോമീറ്റർ ദൂരമാണ് കൊച്ചി മെട്രോയുടെ ഒന്നാംഘട്ടത്തിൽ പൂർത്തിയാകുന്നത്. 7,377 കോടിരൂപയാണ് ആകെ ചെലവ്.