തിരുവനന്തപുരം: ജീവനക്കാരുടെയും അധ്യാപകരുടെയും ശമ്പളവും പെന്ഷനും കൊടുക്കാന് കഴിവില്ലാത്ത മുഖ്യമന്ത്രി ഭരണം രാജ്ഭവനെ ഏല്പിക്കണമെന്ന് ഫെറ്റോ സംസ്ഥാന ജനറല് സെക്രട്ടറി പി.എസ്. ഗോപകുമാര് ആവശ്യപ്പെട്ടു. ഫെറ്റോയുടെ നേതൃത്വത്തില് നടത്തിയ സെക്രട്ടേറിയറ്റ് മാര്ച്ച് ഉദ്ഘാടനം ചെയ്യുകയായിരുന്നു അദ്ദേഹം.
ചരിത്രത്തിലാദ്യമായാണ് ശമ്പളവും പെന്ഷനും ഒന്നാം തീയതി കൊടുക്കാന് കഴിയാത്ത സാഹചര്യം സംസ്ഥാനത്തുണ്ടായത്. സര്ക്കാരിന്റെ വാക്ക് വിശ്വസിച്ച കര്ഷകരും ക്ഷേമ പെന്ഷന് ലഭിച്ചുകൊണ്ടിരുന്ന വൃദ്ധരും നാള്ക്കുനാള് സംസ്ഥാനത്ത് ആത്മഹത്യ ചെയ്തുകൊണ്ടിരിക്കുന്നു. പൊതുവിപണിയിലെ വിലക്കയറ്റം പിടിച്ചു നിര്ത്തുന്നതില് പരാജയപ്പെട്ടു. സപ്ലൈകോയിലെ സബ്സിഡി വെട്ടിക്കുറച്ച് സാധാരണക്കാരുടെ ജീവിതം ദുസഹമാക്കി. വേതനവും നിഷേധിച്ചതിലൂടെ സംസ്ഥാനത്ത് ഭരണസ്തംഭനം പരിപൂര്ണമായി.
ശമ്പളം ഏറെ പ്രതീക്ഷയോടെ കാത്തിരിക്കുന്നത് കുടുംബാംഗങ്ങള് മാത്രമല്ല. പാല്ക്കാര്, പത്രക്കാര്, പലചരക്ക്, പച്ചക്കറി കച്ചവടക്കാര്, മെഡിക്കല് സ്റ്റോറുകാര്, ട്യൂഷന് അദ്ധ്യാപകര് തുടങ്ങി സമൂഹത്തിലെ അടിസ്ഥാന ജനവിഭാഗക്കാരാണ്. 30 ദിവസം ജോലിചെയ്ത ശേഷം കൂലി കിട്ടാന് തെരുവില് സമരം ചെയ്യേണ്ടി വരുന്നത് കേരളത്തില് മാത്രമാണ്. ഭരണമെന്നാല് മുഖ്യമന്ത്രിക്കും മന്ത്രിമാര്ക്കും പരിവാരങ്ങള്ക്കും മാത്രം ആഡംബര സൗകര്യം ഒരുക്കലല്ലെന്നും ഗോപകുമാര് പറഞ്ഞു.
ഫെറ്റോ ജില്ലാ പ്രസിഡന്റ് എസ്. വിനോദ്കുമാര് അധ്യക്ഷനായി. കേരള ഗസറ്റഡ് ഓഫീസേഴ്സ് സംഘ് സംസ്ഥാന പ്രസിഡന്റ് ബി. മനു, എന്ജിഒ സംഘ് സംസ്ഥാന സെക്രട്ടറി പ്രദീപ് പുള്ളിത്തല, ഫെഡറേഷന് ഓഫ് യൂണിവേഴ്സിറ്റി എംപ്ലോയീസ് സംഘ് ജനറല് സെക്രട്ടറി എസ്. അരുണ് കുമാര്, പിഎസ്സി എംപ്ലോയീസ് സംഘ് സംസ്ഥാന ജനറല് സെക്രട്ടറി ആര്. ഹരികൃഷ്ണന്, പെന്ഷണേഴ്സ് സംഘ് ജില്ലാ പ്രസിഡന്റ് ജയകുമാര് കൈപ്പള്ളി, സെക്രട്ടറിയേറ്റ് എംപ്ലോയീസ് സംഘ് ജനറല് സെക്രട്ടറി ടി. ഐ. അജയകുമാര്, ഫെറ്റോ സംസ്ഥാന ട്രഷറര് സി.കെ. ജയപ്രസാദ് എന്നിവര് സംസാരിച്ചു. പ്രകടനത്തിന് ജില്ലാ നേതാക്കളായ എ. അരുണ്കുമാര്, ജി. ഹരികുമാര്, ബി.ജി. സതിഷ്കുമാര്, സന്തോഷ് അമ്പറത്തലയില് തുടങ്ങിയവര് നേതൃത്വം നല്കി.
