ന്യൂദല്ഹി: തെലങ്കാനയില് നിന്നുള്ള ബിആര്എസ് എംപി പോത്തുഗന്തി രാമുലു ബിജെപിയില് ചേര്ന്നു. നാഗര്കുര്ണൂല് മണ്ഡലത്തില് നിന്നുള്ള എംപിയാണ് അദ്ദേഹം. ബിജെപി ദേശീയ ആസ്ഥാനത്ത് നടന്ന ചടങ്ങില് ജനറല് സെക്രട്ടറി തരുണ് ചുഗ്, കേന്ദ്രമന്ത്രി രാജീവ് ചന്ദ്രശേഖര് എന്നിവര് ചേര്ന്ന് പാര്ട്ടി അംഗത്വം കൈമാറി.
ബിആര്എസ് യുവനേതാവും രാമുലുവിന്റെ മകനുമായ ഭരത് പ്രസാദ്, ജില്ലാ കൗണ്സില് ചെയര്മാനായ ആര്. ലോക്നാഥ് റെഡ്ഡി, ഡിസിസിബി ഡയറക്ടര് ജക്ക രഘുനന്ദന് റെഡ്ഡി, സര്പഞ്ച് അസോസിയേഷന് മുന് സംസ്ഥാന പ്രസിഡന്റ് വെന്റപ്പള്ളി പുരുഷോത്തം റെഡ്ഡി എന്നിവരും രാമുലുവിനൊപ്പം ബിജെപിയില് ചേര്ന്നു. ബിജെപി പാര്ലമെന്ററി ബോര്ഡ് അംഗം കെ. ലക്ഷ്മണ്, ദേശീയ വൈസ് പ്രസിഡന്റ് ഡി.കെ. അരുണ, തമിഴ്നാട് കോ- ഇന്ചാര്ജ് കെ. സുധാകര് റെഡ്ഡി, ബിജെപിദേശീയ വക്താവ് സയ്യിദ് സഫര് ഇസ്ലാം എന്നിവരും വാര്ത്താസമ്മേളനത്തില് പങ്കെടുത്തു.
