ഹൈദരാബാദ്: സ്വാതന്ത്ര്യാനന്തരം രാജ്യത്തെ ഗ്രാമങ്ങളിൽ നിന്ന് പട്ടണങ്ങളിലേക്കുള്ള വലിയ തോതിലുള്ള കുടിയേറ്റത്തിന് ഉത്തരവാദി കോൺഗ്രസാണെന്ന് കേന്ദ്രമന്ത്രി നിതിൻ ഗഡ്കരി വ്യാഴാഴ്ച പറഞ്ഞു.
ലോക്സഭാ തെരഞ്ഞെടുപ്പിന് മുന്നോടിയായി സംസ്ഥാന ബിജെപി നടത്തുന്ന വിജയ് സങ്കൽപ് യാത്രയുടെ ഭാഗമായി തെലങ്കാനയിലെ നിസാമാബാദിൽ നടന്ന റാലിയിൽ സംസാരിക്കുകയായിരുന്നു അദ്ദേഹം.
രാജ്യത്തിന്റെ പ്രഥമ പ്രധാനമന്ത്രി ജവഹർലാൽ നെഹ്റു നിരവധി വാഗ്ദാനങ്ങൾ നൽകിയെങ്കിലും ഗ്രാമങ്ങളുടെയും പാവപ്പെട്ടവരുടെയും തൊഴിലാളികളുടെയും കർഷകരുടെയും ക്ഷേമം സ്വാതന്ത്ര്യത്തിന് ശേഷം നടന്നിട്ടില്ലെന്നും അദ്ദേഹം ആരോപിച്ചു.
ഇതിനു പുറമെ കശ്മീർ മുതൽ കന്യാകുമാരി വരെ എൻഡിഎ സർക്കാർ റോഡുകൾ നിർമിച്ചതായി മന്ത്രി പറഞ്ഞു. ഇനിയും യുവാക്കൾക്ക് ജോലിയും കർഷകരുടെ ക്ഷേമവും സ്ത്രീകളുടെ അവകാശങ്ങളും ഉറപ്പാക്കാൻ ബിജെപിയെ പിന്തുണയ്ക്കണമെന്ന് ഗഡ്കരി ജനങ്ങളോട് അഭ്യർത്ഥിച്ചു.
