പത്തനംതിട്ട: കോണ്‍ഗ്രസിന്റെ സമരാഗ്നി ജാഥ പരിസമാപ്തിയിലേക്ക് കടക്കുമ്പോള്‍ കെപിസിസി പ്രസിഡന്റും പ്രതിപക്ഷനേതാവും തമ്മിലുള്ള ഏറ്റുമുട്ടല്‍ രൂക്ഷമാകുന്നു. ഇന്നലെ പത്തനംതിട്ടയില്‍ കെ. സുധാകരനും വി.ഡി. സതീശനും ഒരുമിച്ചുള്ള വാര്‍ത്താസമ്മേളനം ഒഴിവാക്കി. ആലപ്പുഴയിലെ അസഭ്യ പ്രയോഗത്തില്‍ കെ.സി. വേണുഗോപാലടക്കമുള്ളവര്‍ മൗനം പാലിച്ചതാണ് വി.ഡി. സതീശനെ ചൊടിപ്പിച്ചത്.
സുധാകരനും സതീശനും ഒരുമിച്ച് വാര്‍ത്താസമ്മേളനം നടത്തുമെന്ന് പത്തനംതിട്ട ഡിസിസി ആദ്യം അറിയിച്ചിരുന്നെങ്കിലും പിന്നീട് വാര്‍ത്താസമ്മേളനമില്ലെന്ന് ഡിസിസി തന്നെ വ്യക്തമാക്കുകയായിരുന്നു. വിഷയത്തില്‍ തനിക്കുള്ള പ്രതിഷേധം കേരളത്തിന്റെ ചുമതലയുള്ള എഐസിസി ജനറല്‍ സെക്രട്ടറി ദീപാദാസ് മുന്‍ഷിക്ക് സതീശന്‍ രേഖാമൂലം നല്കി.
എന്നാല്‍ ഇരുവരും തമ്മിലുള്ള അസ്വാരസ്യം ജാഥയുടെ ശോഭ കെടുത്തിയെന്നാണ് മുതിര്‍ന്ന നേതാക്കളുടെ അഭിപ്രായം. ആലപ്പുഴയില്‍ വച്ച് വി.ഡി. സതീശന്‍ വാര്‍ത്താസമ്മേളനത്തിന് എത്താന്‍ വൈകിയതില്‍ നീരസം പ്രകടിപ്പിക്കുന്നതിനിടെ കെ. സുധാകരന്‍ അസഭ്യവര്‍ഷം നടത്തിയത് വി.ഡി. സതീശനെ ചൊടിപ്പിച്ചിരുന്നു. ഇതോടെയാണ് ജാഥയുടെ ഭാഗമായുള്ള പത്തനംതിട്ടയിലെ സംയുക്ത വാര്‍ത്താസമ്മേളനവും ഒഴിവാക്കിയത്.
പ്രതികരിക്കാൻ ഇവിടെ എഴുതുക: