കാഴ്ച പരിമിതരുടെ ക്രിക്കറ്റ്: ഭാരതത്തിന് വിജയം

ദുബായി: കാഴ്ച പരിമിതരുടെ ത്രിരാഷ്‌ട്ര സൗഹൃദ ക്രിക്കറ്റ് ടൂര്‍ണമെന്റ് രണ്ടാം പതിപ്പില്‍ ഭാരതത്തിന് വിജയം. പാക്കിസ്ഥാനെ 46 റണ്‍സിനു തോല്‍പ്പിച്ചു. ആദ്യം ബാറ്റ് ചെയ്ത ഇന്ത്യ നിശ്ചിത 20 ഓവറില്‍ മൂന്ന് വിക്കറ്റ് നഷ്ടത്തില്‍ 224 റണ്‍സ് നേടി. ഒപ്പണര്‍മാരായ സുനില്‍ രമേശും(87), വെങ്കിടേശ്വര റാവു(56)വും മികച്ച തുടക്കം നല്‍കി. അജയകുമാര്‍ റെഡ്ഡിയും(42) മികവ് കാട്ടി.

മറുപടി ബാറ്റിങ്ങിനിറങ്ങിയ പാക്കിസ്ഥാന്‍ 6 വിക്കറ്റ് നഷ്ടത്തില്‍ 178 രണ്‍സിന് പുറത്തായി. 42 പന്തില്‍ 58 റണ്‍സെടുത്ത മുഹമ്മദ് സല്‍മാന്‍ മാത്രമാണ് പാക്കിസ്ഥാന്‍ നിരയില്‍ തിളങ്ങിയത്. ടി.ദുര്‍ഗറാവു, ദേവരാജ് ബഹറ, അജയ് കുമാര്‍ റെഡ്ഢി എന്നിവര്‍ ഓരോ വിക്കറ്റ് വീതം നേടി. സുനില്‍ രമേശാണ് കളിയിലെ താരം. പരമ്പരയിലെ ആദ്യ മത്സരത്തില്‍ ഇന്ത്യ പാകിസ്ഥാനോട് അഞ്ച് വിക്കറ്റിനു പരാജയപ്പെട്ടിരുന്നു.