പഞ്ച്കുല: അഞ്ചാമത് ചിത്രഭാരതി ദേശീയ ചലച്ചിത്രോത്സവത്തിന് ഹരിയാനയിലെ പഞ്ച്കുലയില്‍ പ്രൗഢോജ്ജ്വല തുടക്കം. സിനിമയില്‍ രാജ്യത്തിന്റെ തനിമയ്‌ക്കും സംസ്‌കാരത്തിനും ഇടംവേണമെന്ന് ചലച്ചിത്ര നിര്‍മാതാവും സംവിധായകനുമായ വിവേക് അഗ്നിഹോത്രി. ചിത്രഭാരതി ചലച്ചിത്രോത്സവത്തില്‍ സംസാരിക്കുകയായിരുന്നു അദ്ദേഹം.
അണിയറയിലൊരുങ്ങുന്ന തന്റെ ദല്‍ഹി ഫയല്‍സ് എന്ന ചിത്രം മലബാറിലെ മാപ്പിളക്കലാപം മുതല്‍ കഴിഞ്ഞ 100 വര്‍ഷത്തിനിടയില്‍ രാജ്യത്ത് നടന്ന ഏകപക്ഷീയമായ നരഹത്യയുടെ കഥയാണ് പറയുന്നത്. ചില കഥകള്‍ സമൂഹത്തോട് പറയാതിരിക്കുന്നതും കുറ്റകൃത്യമാണെന്ന് ഞാന്‍ കരുതുന്നു. രാജ്യത്തെ ഓരോ കുടുംബത്തിനും ഓരോ തെരുവിനും കഥയുണ്ട്. ചെറിയ ചെറിയ അത്തരം കഥകള്‍ സോഷ്യല്‍ മീഡിയകള്‍ നിറയണം, വിവേക് അഗ്നിഹോത്രി പറഞ്ഞു.
സിനിമയില്‍ അജണ്ടയുണ്ട് എന്നത് അംഗീകരിക്കാനാകില്ലെന്ന് പ്രശസ്ത സംവിധായകനും നടനുമായ ഡോ. ചന്ദ്രപ്രകാശ് ദ്വിവേദി പറഞ്ഞു. ഞാന്‍ സിനിമ ചെയ്യുന്നത് ആഴത്തിലുള്ള ഗവേഷണത്തിന് ശേഷമാണ്. ചിലര്‍ എനിക്കെതിരെ ഫത്വ പുറപ്പെടുവിക്കാറുണ്ട്, ഞാനത് കാര്യമാക്കാറില്ല. രാജ്യത്തിന് വേണ്ടി പൂര്‍ണ്ണ സത്യസന്ധതയോടെയാണ് ഞാന്‍ പ്രവര്‍ത്തിക്കുന്നത്. അതിനെ അജണ്ട എന്ന് ആരെങ്കിലും ആക്ഷേപിച്ചാല്‍ അതൊരു മോശം കാര്യമല്ല, ചന്ദ്രപ്രകാശ് ദ്വിവേദി പറഞ്ഞു.
ആളുകളുടെ ഓര്‍മശക്തി ദുര്‍ബലമാവുകയാണ്. അച്ഛന്റെയോ മുത്തച്ഛന്റെയോ ചിത്രം പോലും പലരും സൂക്ഷിക്കുന്നില്ല. ഭൂതകാലം മഹത്തരമാണ്. അത് വഴിയില്‍ ഉപേക്ഷിക്കാനുള്ളതല്ല. ഞാന്‍ ചാണക്യ സീരിയല്‍ എടുത്തു. അതെന്റെ പ്രതിബദ്ധതയായിരുന്നു.
സിനിമകള്‍ക്കെതിരായ പ്രതിഷേധങ്ങള്‍ രാഷ്‌ട്രീയമാണ്. സിനിമ വിജയിക്കുക എന്നതാണ് ചലച്ചിത്ര പ്രവര്ത്തകന് പ്രധാനം. പൃഥ്വിരാജ് എന്ന സിനിമ വിജയിച്ചില്ല, അതുകൊണ്ട് തന്നെ മറ്റ് അഞ്ച് സിനിമകള്‍ എനിക്ക് ഉപേക്ഷിക്കേണ്ടി വന്നു, അദ്ദേഹം പറഞ്ഞു.
സിനിമകള്‍ സമൂഹത്തില്‍ നല്ല മൂല്യങ്ങള്‍ പകര്‍ത്താനുള്ളതാകണമെന്ന് ചലച്ചിത്രോത്സവം ഉദ്ഘാടനം ചെയ്ത് ഹരിയാന മുഖ്യമന്ത്രി മനോഹര്‍ലാല്‍ ഖട്ടാര്‍ പറഞ്ഞു. ദേശത്തിന്റെ തനിമയും സംസ്‌കൃതിയും പ്രചരിപ്പിക്കുന്നതിനായാണ് ഹരിയാന സര്‍ക്കാര്‍ ഫിലിം ആന്‍ഡ് എന്റര്‍ടെയ്ന്‍മെന്റ് പോളിസി ഉണ്ടാക്കിയത്. ഈ നയത്തിന്റെ ഭാഗമായി പഞ്ച്കുലയിലെ പിഞ്ചോറില്‍ ഫിലിം സിറ്റി സ്ഥാപിക്കുമെന്ന് അദ്ദേഹം പറഞ്ഞു. ഹരിയാന നിയമസഭാ സ്പീക്കര്‍ ഗ്യാന്‍ ചന്ദ് ഗുപ്തയും ചടങ്ങില്‍ പങ്കെടുത്തു.
അനന്ത് വിജയ് എഴുതിയ ഒടിടി കാ മായാജാല്‍ എന്ന പുസ്തകം മുഖ്യമന്ത്രി പ്രകാശനം ചെയ്തു.
എട്ട് ഷോര്‍ട്ട് ഫിലിമുകള്‍, ഒന്‍പത് ഡോക്യുമെന്ററികള്‍, കുട്ടികളുടെ 13 സിനിമകള്‍, 17 കാമ്പസ് പ്രൊഫഷണല്‍ ഷോര്‍ട്ട് ഫിലിംസ് എന്നിവയുടെ പ്രദര്‍ശനത്തോടെയാണ് ത്രിദിന ചലച്ചിത്രമേളയ്‌ക്ക് ഹരിയാന ടൂറിസം വകുപ്പിന്റെ റെഡ് ബിഷപ് കോംപ്ലക്സില്‍ തുടക്കം കുറിച്ചത്. ചലച്ചിത്രോത്സവത്തിലെ മികച്ച സിനിമകള്‍ക്ക് 10 ലക്ഷം രൂപയും പ്രശസ്തി പത്രവും ഭാരതീയ ചിത്ര സാധന ശില്പവും നല്‍കി ആദരിക്കും.
ഭാരതീയ ചിത്ര സാധനയുടെ അഞ്ചാം പതിപ്പില്‍ 19 സംസ്ഥാനങ്ങളില്‍ നിന്ന് 25 ഭാഷകളിലായി 663 സിനിമകളാണ് അപേക്ഷകളായി വന്നത്. അതില്‍ തെരഞ്ഞെടുത്ത 133 ചിത്രങ്ങളുടെ പ്രദര്‍ശനമാണ് ചലച്ചിത്രോത്സവത്തില്‍ ഉള്‍പ്പെടുത്തിയിട്ടുള്ളത്.
പ്രതികരിക്കാൻ ഇവിടെ എഴുതുക: