കൊൽക്കത്ത: പ്രശ്നബാധിതമായ സന്ദേശ്ഖാലി മേഖലയിലെ ഇരകളായ സ്ത്രീകൾക്ക് തങ്ങളുടെ വീടുകളിൽ സുരക്ഷിതരല്ലെന്ന് തോന്നുന്നുണ്ടെങ്കിൽ രാജ്ഭവന്റെ വാതിലുകൾ തുറന്ന് കൊടുക്കാനുള്ള പശ്ചിമ ബംഗാൾ ഗവർണർ സി.വി. ആനന്ദ ബോസിന്റെ നീക്കത്തെ രണ്ട് തൃണമൂൽ കോൺഗ്രസ് എംപിമാർ സ്വാഗതം ചെയ്തു.
നോർത്ത് 24 പർഗാനാസ് ജില്ലയിലെ സന്ദേശ്ഖാലിയിലെ പീഡനത്തിനിരയായ സ്ത്രീകളുടെ അവസ്ഥ മനസ്സിലാക്കിയ ഗവർണറെ കോണ്ടായി എംപി സിസിർ അധികാരിയും ഇളയ മകനും തംലുക്ക് എംപിയുമായ ദിബ്യേന്ദുവും പ്രശംസിച്ചു.
ഗവർണറുടെ നടപടി നന്ദിഗ്രാം സമരത്തെ ഓർമ്മിപ്പിച്ചെന്ന് പിടിഐയോട് സംസാരിച്ച സിസിർ അധികാരി പറഞ്ഞു. ഇതൊരു മഹത്തായ ചിന്തയാണ്. സിപിഎം ആക്രമികളെ ഭയന്ന് ആ ഗ്രാമത്തിലെ നിരവധി ആളുകളെ തന്റെ വസതിയിലും ബന്ധുക്കളുടെയും സുഹൃത്തുക്കളുടെയും സ്ഥലങ്ങളിൽ പാർപ്പിക്കേണ്ടത് ഓർമ്മ വന്നുവെന്ന് അദ്ദേഹം പറഞ്ഞു. ബംഗാൾ നിയമസഭയിലെ പ്രതിപക്ഷ നേതാവായിരുന്ന സുവേന്ദു അധികാരിയുടെ പിതാവാണ് സിസിർ അധികാരി.
ബോസിന്റെ നടപടിയെ ദിബ്യേന്ദു കത്തിലൂടെയാണ് പ്രശംസിച്ചത്. രാജ്ഭവൻ വളപ്പിൽ സന്ദേശ്ഖാലിയിൽ നിന്ന് പീഡനത്തിനിരയായ സ്ത്രീകൾക്ക് അഭയം നൽകാൻ നിങ്ങൾ സ്വീകരിച്ചത് ശരിക്കും സങ്കൽപ്പിക്കാനാവാത്ത നടപടിയാണെന്നാണ് അധികാരി എഴുതിയത്. ഇരയായ സ്ത്രീകൾക്ക് എന്തെങ്കിലും പിന്തുണയ്ക്കായി നിങ്ങളുടെ പക്ഷത്ത് നിൽക്കാൻ നിങ്ങൾ എന്നെ അനുവദിക്കുകയാണെങ്കിൽ ഞാൻ വ്യക്തിപരമായി ബാധ്യസ്ഥനാണെന്നും തംലുക്ക് എംപി കൂട്ടിച്ചേർത്തു.
സന്ദേശ്ഖാലിയിലെ സ്ത്രീകളുടെ രാഖി സഹോദരനായി സ്വയം കരുതുന്ന ബംഗാൾ ഗവർണർ ഇരകളായ സ്ത്രീകളെ സംരക്ഷിക്കാൻ തന്റെ കഴിവിന്റെ പരമാവധി ചെയ്യുമെന്ന് പ്രതിജ്ഞയെടുത്തിരുന്നു. സന്ദേശ്ഖാലിയിൽ നിന്നുള്ള പീഡിപ്പിക്കപ്പെട്ട സ്ത്രീകൾക്ക് രാജ്ഭവനിൽ അഭയം തേടാമെന്നും അവിടെ അവർക്ക് പാർപ്പിടവും ഭക്ഷണവും സുരക്ഷയും നൽകുമെന്നുമാണ് അദ്ദേഹം ഉറപ്പുനൽകിയത്.
