ഹൈദരാബാദ് :വിവാഹം അടുത്തുവരവെ ചിരി മനോഹരമാക്കാന്‍ ദന്തല്‍ ക്ലിനിക്കില്‍ ചികിത്സയ്‌ക്ക് വിധേയനായ യുവാവ് മരിച്ചു.ചിരിയുടെ ഭംഗി വര്‍ദ്ധിപ്പിക്കാന്‍ ശസ്ത്രക്രിയയ്‌ക്ക് വിധേയനായ ലക്ഷ്മി നാരായണന്(28) ആണ് മരിച്ചത്.
ഈ മാസം 16 നാണ് സംഭവം.വിവാഹത്തിന് മുമ്പ് ‘സ്‌മൈല്‍ ഡിസൈനിംഗ്’ ചികിത്സ നടത്തുകയായിരുന്നു യുവാവ്.
ചികിത്സയ്‌ക്ക് പോയ യുവാവ് വൈകുന്നേരമായിട്ടും മടങ്ങിയെത്താത്തതിനെ തുടര്‍ന്ന് പിതാവ് വിഞ്ചം രാമുലു മകന്റെ ഫോണിലേക്ക് വിളിച്ചപ്പോള്‍ ക്ലിനിക്കിലെ ജീവനക്കാരാണ് ലക്ഷ്മി നാരായണന് ബോധം പോയെന്ന് അറിയിച്ചത്. ലക്ഷ്മി നാരായണനെ ഉടന്‍ തന്നെ ദന്തല്‍ ക്ലിനിക്കിന് സമീപമുളള ആശുപത്രിയില്‍ എത്തിച്ചെങ്കിലും അവിടെ എത്തുമ്പോഴേക്കും മരിച്ചിരുന്നുവെന്നാണ് വിവരം.
അതിനിടെ, ഇന്ത്യന്‍ ശിക്ഷാ നിയമത്തിലെ സെക്ഷന്‍ 304 എ പ്രകാരം (അശ്രദ്ധമൂലമുള്ള മരണം) കുടുംബം ഡെന്റല്‍ ക്ലിനിക്കിനെതിരെ പരാതി നല്‍കി.
ലക്ഷ്മി നാരായണന് അമിതമായി അനസ്‌തേഷ്യ നല്‍കിയതാണ് മരണത്തിലേക്ക് നയിച്ചതെന്നും അദ്ദേഹത്തിന്റെ കുടുംബാംഗങ്ങള്‍ ആരോപിച്ചു.ക്ലിനിക്കിലെ സിസിടിവി ദൃശ്യങ്ങള്‍ പൊലീസ് ശേഖരിച്ചു, കേസില്‍ കൂടുതല്‍ അന്വേഷണം നടന്നുവരികയാണ്.
പ്രതികരിക്കാൻ ഇവിടെ എഴുതുക: