പുല്പ്പള്ളി: കാട്ടാന അക്രമണത്തില് ഒരാഴ്ചക്കിടെ രണ്ടുപേര് മരിച്ചതിനെ തുടര്ന്ന് പ്രതിഷേധ സൂചകമായി വയനാട് ഇന്ന് നടന്ന ഹര്ത്താലിനിടെയുള്ള സംഘര്ഷങ്ങളില് പൊലീസ് കേസെടുക്കും. പുല്പ്പള്ളിയില് നടന്ന അക്രമ സംഭവങ്ങളില് ജാമ്യമില്ലാ വകുപ്പുകള് ചുമത്തും.
വനം വകുപ്പ് വാഹന ആക്രമണം, ഉദ്യോഗസ്ഥര്ക്ക് നേരെ ആക്രണം, മൃതദേഹം തടഞ്ഞു, പൊലീസ് ഉദ്യോഗസ്ഥരെ കല്ലെറിഞ്ഞു തുടങ്ങിയ കുറ്റങ്ങള് പ്രതിഷേധക്കാര്ക്കെതിരെ ചുമത്തും. കൃത്യമായി പ്രതികളെ കണ്ടെത്തി അറസ്റ്റ് അടക്കം നടപടികളിലേക്ക് കടക്കും. അക്രമികളെ കണ്ടെത്താന് പുല്പ്പള്ളിയില് നടന്ന സംഘര്ഷ ദൃശ്യങ്ങള് പൊലീസ് പരിശോധിക്കുകയാണ്.
ശനിയാഴ്ച ഹര്ത്താലിനിടെ പുല്പ്പള്ളിയില് ജന രോഷം അണപൊട്ടുകയായിരുന്നു. കാട്ടാന ചവിട്ടിക്കൊന്ന പോളിന്റെ മൃതദേഹവും വഹിച്ചുകൊണ്ടായിരുന്നു പുല്പ്പള്ളിയില് ജനക്കൂട്ടം മണിക്കൂറുകളോളം പ്രതിഷേധിച്ചത്. ഇത് സംഘര്ഷത്തിലേക്ക് നീങ്ങിയതോടെ പൊലീസ് ലാത്തിവീശുകയും പുല്പ്പള്ളിയില് നിരോധനാജ്ഞയും പുറപ്പെടുവിച്ചു.
