പാലക്കാട് : ഗവര്‍ണര്‍ ആരിഫ് മൊഹമ്മദ് ഖാന്‍ പോകുന്നിടത്തെല്ലാം നേരത്തേ എത്തി കരിങ്കൊടി കാട്ടുന്നതാണല്ലോ എസ് എഫ് ഐയുടെ രീതി. ഇതിനോട് നിസംഗമമായും പ്രതിഷേധം അതിര് വിടുമ്പോള്‍ ശക്തിയായും പ്രതികരിച്ചിട്ടുണ്ട് ഗവര്‍ണര്‍.
എന്നാല്‍ ഇന്ന് ഗവര്‍ണറെ കരിങ്കൊടി കാട്ടി ഇളിഭ്യരാവുകയായിരുന്നു എസ് എഫ് ഐക്കാര്‍. ആരിഫ് മുഹമ്മദ് ഖാന്റെ വാഹനമെന്ന് കരുതി ആംബുലന്‍സിന് കരിങ്കൊടി കാണിക്കുകയായിരുന്നു എസ്എഫ്‌ഐ പ്രവര്‍ത്തകര്‍. പാലക്കാട് കാഴ്‌ച്ചപ്പറമ്പിലാണ് എസ്എഫ്‌ഐ ആംബുലന്‍സിന് കരിങ്കൊടികാട്ടിയത്.ദേശീയപാത 544 ലൂടെ സൈറനിട്ട് വന്ന വാഹനം ഗവര്‍ണറുടേതാണെന്ന് തെറ്റിദ്ധരിക്കുകയായിരുന്നു എസ്എഫ്‌ഐക്കാര്‍.
കഞ്ചിക്കോട്ടും ഇന്ന് ഗവര്‍ണര്‍ക്കെതിരെ എസ്.എഫ്.ഐ കരിങ്കൊടി കാട്ടിയിരുന്നു. സ്വകാര്യ പരിപാടിയില്‍ പങ്കെടുക്കാന്‍ എത്തിയപ്പോഴായിരുന്നു പ്രതിഷേധം.
അതേസമയം എസ്.എഫ്.ഐക്കാര്‍ എന്തിനാണ് തന്റെ പിറകെ നടക്കുന്നതെന്ന് അവരോട് തന്നെ ചോദിക്കണമെന്നാണ് ഗവര്‍ണര്‍ പ്രതികരിച്ചത്. മുഖ്യമന്ത്രിയും മന്ത്രിമാരുമാണ് എസ്.എഫ്.ഐ പ്രവര്‍ത്തകരെ അയച്ചിരിക്കുന്നതെന്നും ഗവര്‍ണര്‍ പറഞ്ഞു.
പ്രതികരിക്കാൻ ഇവിടെ എഴുതുക: