വയനാട്: ബേലൂര് മഖ്ന എന്ന മോഴ ആനയുടെ ആക്രമണത്തില് കൊല്ലപ്പെട്ട മാനന്തവാടി പടമല സ്വദേശി അജീഷിന്റെ കുടുംബത്തിന് പത്ത് ലക്ഷം രൂപ സാമ്പത്തിക സഹായവുമായി മാനന്തവാടി രൂപത സാമൂഹ്യ സേവന വിഭാഗം. മാനന്തവാടി രൂപതയുടെ പ്രവര്ത്തങ്ങള്ക്കു നേതൃത്വം നല്കുന്ന വയനാട് സോഷ്യല് സര്വീസ് സൊസൈറ്റിയും ബയോവിന് അഗ്രോ റിസര്ച്ചും സംയുക്തമായാണ് സാമ്പത്തിക സഹായം നല്കുന്നത്.
അജീഷിന്റെ രണ്ട് കുട്ടികളുടെയും പേരില് അഞ്ചുലക്ഷം രൂപ വീതം ബാങ്കില് ഫിക്സഡ് ഡിപ്പോസിറ്റ് ഇടാനാണ് സാമൂഹ്യ സേവന വിഭാഗം തീരുമാനിച്ചത്.ഇന്നലെ രാവിലെയാണ് ട്രാക്ടര് ഡ്രൈവറും കര്ഷകനുമായ പടമല പനച്ചിയില് സ്വദേശി അജീഷ് ആനയുടെ ആക്രമണത്തില് കൊല്ലപ്പെട്ടത്.
രാവിലെ ജോലിക്കാരെ കൂട്ടാന് പോയ അജീഷിന്റെ അടുത്തേക്ക് ആന പാഞ്ഞ് എത്തുകയായിരുന്നു. ഓടിയെങ്കിലും ആനയുടെ ആക്രമണത്തില് ജീവന് നഷ്ടപ്പെടുകയായിരുന്നു.
