ന്യൂദല്ഹി: കേന്ദ്ര സായുധ പൊലീസ് സേനയിലെ (സിഎപിഎഫ്) കോണ്സ്റ്റബിള് നിയമനത്തിനുള്ള കോണ്സ്റ്റബിള് (ജിഡി) പരീക്ഷ ഹിന്ദിക്കും ഇംഗ്ലീഷിനും പുറമെ, ഇതാദ്യമായി 13 പ്രാദേശിക ഭാഷകളില് നടത്തും. 2024 ഫെബ്രുവരി 20 മുതല് മാര്ച്ച് 7 വരെ രാജ്യത്തെ 128 നഗരങ്ങളിലായി 48 ലക്ഷം ഉദ്യോഗാര്ഥികള്ക്കായി പരീക്ഷ നടത്തും.
പ്രധാനമന്ത്രി നരേന്ദ്ര മോദിയുടെ നേതൃത്വത്തില് കേന്ദ്ര ആഭ്യന്തരസഹകരണ മന്ത്രി അമിത് ഷായുടെ മാര്ഗനിര്ദേശപ്രകാരം, 2024 ജനുവരി 1 മുതല് ഹിന്ദിക്കും ഇംഗ്ലീഷിനും പുറമേ 13 പ്രാദേശിക ഭാഷകളില് കോണ്സ്റ്റബിള് (ജനറല് ഡ്യൂട്ടി) പരീക്ഷ നടത്താന് ആഭ്യന്തര മന്ത്രാലയം തീരുമാനിച്ചിരുന്നു.
കേന്ദ്ര സായുധ പൊലീസ് സേനയില് പ്രാദേശിക യുവാക്കളുടെ പങ്കാളിത്തം വര്ധിപ്പിക്കുന്നതിനും പ്രാദേശിക ഭാഷകള് പ്രോത്സാഹിപ്പിക്കുന്നതിനുമായി കേന്ദ്ര ആഭ്യന്തരസഹകരണ മന്ത്രി അമിത് ഷായുടെ മുന്കൈയെടുത്താണു ചരിത്രപരമായ ഈ തീരുമാനം കൈക്കൊണ്ടത്.
കോണ്സ്റ്റബിള് (ജനറല് ഡ്യൂട്ടി) പരീക്ഷയുടെ ചോദ്യപേപ്പറുകള് ഹിന്ദിക്കും ഇംഗ്ലീഷിനും പുറമേ ഇനിപ്പറയുന്ന 13 പ്രാദേശിക ഭാഷകളില് തയ്യാറാക്കും:
- മലയാളം
- കന്നഡ
- തമിഴ്
- തെലുങ്ക്
- ഒഡിയ
- ഉറുദു
- പഞ്ചാബി
- മണിപ്പൂരി
- കൊങ്കണി
- അസമീസ്
- ബംഗാളി
- ഗുജറാത്തി
- മറാത്തി
രാജ്യത്തുടനീളമുള്ള ലക്ഷക്കണക്കിനു യുവാക്കളെ ആകര്ഷിക്കുന്ന സ്റ്റാഫ് സെലക്ഷന് കമ്മീഷന് (എസ്എസ്സി) നടത്തുന്ന പ്രധാന പരീക്ഷകളിലൊന്നാണു കോണ്സ്റ്റബിള് ജിഡി പരീക്ഷ. അതിനാല്, ഹിന്ദിക്കും ഇംഗ്ലീഷിനും പുറമേ മുകളില് സൂചിപ്പിച്ച 13 പ്രാദേശിക ഭാഷകളിലും പരീക്ഷ നടത്തുന്നതിനുള്ള ധാരണാപത്രത്തില് ആഭ്യന്തര മന്ത്രാലയവും സ്റ്റാഫ് സെലക്ഷന് കമ്മീഷനും ഒപ്പുവച്ചു. അതനുസരിച്ച്, 2024ലെ കോണ്സ്റ്റബിള് (ജിഡി) പരീക്ഷ ഇംഗ്ലീഷിനും ഹിന്ദിക്കും പുറമേ മറ്റ് 13 പ്രാദേശിക ഭാഷകളിലും നടത്താന് എസ്എസ്സി വിജ്ഞാപനം പുറപ്പെടുവിച്ചു.
ഈ തീരുമാനം ലക്ഷക്കണക്കിനു യുവാക്കളെ അവരുടെ മാതൃഭാഷയില്/പ്രാദേശിക ഭാഷയില് പരീക്ഷയില് പങ്കെടുക്കുന്നതിനും തെരഞ്ഞെടുക്കപ്പെടുതിനുള്ള അവരുടെ സാധ്യതകള് മെച്ചപ്പെടുത്തുന്നതിനും സഹായിക്കും. തല്ഫലമായി, രാജ്യത്തുടനീളമുള്ള ഉദ്യോഗാര്ഥികള്ക്കിടയില് ഈ പരീക്ഷയുടെ വ്യാപ്തി വര്ധിക്കുകയും ഏവര്ക്കും തുല്യ തൊഴിലവസരം ലഭിക്കുകയും ചെയ്യും.
കേന്ദ്രഗവണ്മെന്റിന്റെ ഈ ഉദ്യമത്തിലൂടെ, രാജ്യത്തുടനീളമുള്ള യുവാക്കള്ക്ക് അവരുടെ മാതൃഭാഷയില് സിഎപിഎഫ് കോണ്സ്റ്റബിള് (ജനറല് ഡ്യൂട്ടി) പരീക്ഷയില് പങ്കെടുക്കാനും രാഷ്ട്രസേവനത്തില് തൊഴിലെടുക്കാനുമുള്ള സുവര്ണാവസരമാണു ലഭിച്ചിരിക്കുന്നത്.
