വയനാട്ടിൽ വീണ്ടും റേഡിയോ കോളർ ഘടിപ്പിച്ച കാട്ടാന; ഗേറ്റ് തകർത്ത് അകത്ത് കയറി; ഒരാൾക്ക് ദാരുണാന്ത്യം

വയനാട്: സുൽത്താൻബത്തേരിയിൽ വീണ്ടും കാട്ടാനയിറങ്ങി. ഇന്ന് രാവിലെ അതിർത്തിയിലെ വനത്തിൽ നിന്നെത്തിയ ആന പടമലയിലെ ജനവാസ മേഖലയിലെത്തി. വീടിന്റെ ഗേറ്റും മതിലും തകർത്ത് അകത്ത് കടന്ന ആനയുടെ ആക്രമണത്തിൽ ഒരാൾക്ക് ദാരുണാന്ത്യ.

പടമല സ്വദേശി അജിയാണ് മരിച്ചത്. കർണാടകയിൽ നിന്നുള്ള റേഡിയോ കോളർ ഘടിപ്പിച്ച ആനയാണ് വയനാട്ടിലിറങ്ങിയത്. റേഡിയോ കോളർ ഘടിപ്പിച്ച കർണാടകയിൽ നിന്നെത്തിയ ആനയാണ് ആക്രമണം നടത്തിയത്. പുലർച്ചെയോടെ ആന ജനവാസ മേഖലയിൽ ഇറങ്ങിയതായി റേഡിയോ കോളറിൽ നിന്നും വ്യക്തമായിരുന്നു.

തുടർന്ന് വനം വകുപ്പ് കാട്ടാനയെ ഇവിടെ നിന്നും തുരത്തി ചാലിഗദ്ദ എന്ന സ്ഥലത്തെത്തിച്ചു. എന്നാൽ കൃഷിയിടത്തിലേക്ക് ജോലിക്കാരെ വിളിക്കുന്നതിനായി പോയ അജിയെ ആന ഓടിക്കുകയായിരുന്നു. അജി തൊട്ടടുത്തുള്ള വീട്ടിലേക്ക് മതിൽ ചാടി കടന്ന് കയറിയെങ്കിലും പിന്നാലെയെത്തിയ ആന ഗേറ്റ് പൊളിച്ചു കയറി ആക്രമിക്കുകയായിരുന്നു.