ലെവര്കൂസെന്: ആവേശകരമായ മത്സരത്തിനൊടുവില് ലെവര്കൂസെന് ജര്മന് കപ്പ് സെമിയില് കടന്നു. ക്വാര്ട്ടറില് സ്റ്റട്ട്ഗാര്ട്ടിന്റെ ശക്തമായ വെല്ലുവിളിയെ മറികടന്നാണ് സ്വന്തം തട്ടകത്തില് ലെവര്കൂസെന് വിജയം നേടിയെടുത്തത്.
90-ാം മിനിറ്റില് ജോനാതന് ടാഹ് നേടിയ ഹെഡ്ഡര് ഗോള് ആണ് ലെവര്കൂസെനെ വിജയിപ്പിച്ചത്. അതിന് മുമ്പ് രണ്ട് തവണ സ്റ്റട്ട്ഗാര്ട്ട് ലെവര്കൂസെനെ പിന്നിലാക്കിയതാണ്. രണ്ട് വട്ടവും സമനില പിടിച്ച ശേഷം ടാഹിലൂടെ വിജയഗോളും നേടിയെടുത്തു.
ഇരുഭാഗത്തുനിന്നും മികച്ച നീക്കങ്ങള് കണ്ട മത്സരത്തില് ആദ്യ പകുതിയില് സ്റ്റട്ട്ഗാര്ട്ട് ലീഡ് ചെയ്തു. വാല്ദെമര് ആന്റോണ് സ്റ്റട്ട്ഗാര്ട്ടിനായി ആദ്യ ഗോള് നേടി. കളിയുടെ 11-ാം മിനിറ്റിലായിരുന്നു സ്റ്റട്ട്ഗാര്ട്ടിന്റെ ലീഡ്. മറുപടി നല്കാനുള്ള ലെവര്കൂസെന് ശ്രമങ്ങളെല്ലാം ആദ്യ പകുതിയില് വിഫലമായി.
രണ്ടാം പകുതി തുടങ്ങിയപ്പോള് തന്നെ റോബര്ട്ട് ആന്ഡ്രിച്ചിന്റെ ഗോളില് ലെവര്കൂസെന് ഓപ്പമെത്തി. 50-ാം മിനിറ്റില് നേടിയ ഈ സമനിലഗോളിനെ മറികടന്ന് സ്റ്റട്ട്ഗാര്ട്ട് വീണ്ടും ഗോളടിച്ചു. എട്ട് മിനിറ്റ് ശേഷം ക്രിസ് ഫൂഹ്റിച്ച് ആണ് ഗോള് നേടിയത്. മികച്ചൊരു കൗണ്ടര് അറ്റാക്കിലൂടെ അമൈന് ആഡ്ലി 66-ാം മിനിറ്റില് വീണ്ടും സ്റ്റട്ട്ഗാര്ട്ടിന് മറുപടി നല്കി.
കളിസമയം 90 മിനിറ്റെത്തിയ നിര്ണായക ഘട്ടത്തില് ജോനാതന് ടാഹ് ലെവര്കൂസെനെ വിജയിപ്പിച്ചു. മത്സരത്തില് 3-2നാണ് ലെവര്കൂസെന് വിജയിച്ചത്.
