അടൂര്: കേരളത്തില് പട്ടിണിയില്ലാത്തത് നരേന്ദ്രമോദി സര്ക്കാര് രാജ്യം ഭരിക്കുന്നത് കൊണ്ടാണെന്ന് ബിജെപി ദേശീയ നിര്വാഹക സമിതി അംഗം കുമ്മനം രാജശേഖരന്. അടൂരില് കേരള പദയാത്ര ഉദ്ഘാടനം ചെയ്യുകയായിരുന്നു അദ്ദേഹം.
ഭാരത് അരി കേരളീയര്ക്കും ഗുണ ചെയ്യും. കേരളത്തില് ഏകദേശം ലക്ഷം ടണ് അരി മാത്രമാണ് ഉത്പാദിപ്പിക്കുന്നത്. 15 ലക്ഷം ടണ് അരിയാണ് കേന്ദ്രം കൊടുക്കുന്നത്. കേരളത്തില് ഈ ബജറ്റിലും കാര്ഷിക ഉത്പാദനം കൂട്ടാന് ഒരു നടപടിയുമില്ല. തൊഴിലില്ലായ്മയാണ് കേരളത്തിലെ പ്രധാന പ്രശ്നം. തൊഴിലവസരങ്ങളില്ലാത്തതിനാല് യുവാക്കള് നാടുവിടുന്നു.
67 വര്ഷക്കാലമായി കേരളം ഭരിച്ച രണ്ട് മുന്നണികളും ഇതിന് മറുപടി പറയണം. ഒരു രംഗത്തും കേരളം മുന്നില് ഇല്ല. റവന്യൂ കമ്മി വര്ധിച്ചുവരികയാണ്. നാല് ലക്ഷം കോടിയുടെ പൊതുകടമുണ്ടായിട്ടും കേരളം പിടിച്ചു നില്ക്കുന്നത് കേന്ദ്രത്തില് നരേന്ദ്രമോദിയുള്ളതുകൊണ്ടാണെന്നും കുമ്മനം പറഞ്ഞു.
