കോഴിക്കോട്: ഏതു പ്രതിസന്ധികളെയും തരണം ചെയ്യാനുള്ള ആത്മവിശ്വാസത്തോടെ മുന്നേറിയാല് എല്ലാ സ്വപ്നങ്ങളും പൂര്ത്തീകരിക്കാനാകുമെന്നും എന്തും നേടാനാകുമെന്നും കേന്ദ്രമന്ത്രി മീനാക്ഷി ലേഖി. വിവേകാനന്ദ ജയന്തി ആഘോഷങ്ങളുടെ സമാപനമായി ദേശീയ യുവജന ആഘോഷ സമിതിയും വിവിധ യുവജന സാംസ്കാരിക സംഘടനകളുമായി സഹകരിച്ച് കോഴിക്കോട് സംഘടിപ്പിച്ച യൂത്ത് കോണ്ക്ലേവ്-24 ഉദ്ഘാടനം ചെയ്യുകയായിരുന്നു മന്ത്രി.
ജനസംഖ്യയില് രാജ്യത്തെ 65 ശതമാനം 35 വയസില് താഴെയുള്ളവരാണ്. ലക്ഷ്യബോധവും കാഴ്ചപ്പാടുമുള്ള യുവശക്തി രാജ്യനിര്മിതിക്ക് അനുപേക്ഷണീയമാണ്. കേരളത്തിന്റെ യുവത്വം ഊര്ജ്ജസ്വലവും ഉത്സാഹഭരിതവുമാണ് സ്വാതന്ത്ര്യത്തിന്റെ നൂറാം വാര്ഷികത്തില് വികസിത ഭാരതത്തെ നയിക്കാന് യുവത പ്രാപ്തരാവണം. ഇപ്പോള് വികസിത ഭാരതം സ്വപ്നം കണ്ടാല് 2047ല് അതിന്റെ നേതൃസ്ഥാനത്ത് ഇരിക്കാന് നിങ്ങള്ക്കാവും. സ്ത്രീകളുടെ ദുരിതം മനസിലാക്കിയ തന്റെ കലാലയ ജീവിത കാലഘട്ടത്തില് മുത്തലാഖ് ഇല്ലാതാവണമെന്ന് ആഗ്രഹിച്ചു. അന്ന് മുത്തലാഖ് വിഷയത്തില് കേന്ദ്രമന്ത്രി സ്ഥാനം രാജിവച്ച ഇന്നത്തെ കേരള ഗവര്ണര് ആരിഫ് മുഹമ്മദ്ഖാന്റെ ധീരമായ നിലപാടുകള് കാരണം തന്റെ മനസില് അദ്ദേഹം ഹീറോ ആയി. പിന്നീട് മുത്തലാഖ് നിര്ത്തലാക്കാന് തീരുമാനമെടുത്ത മന്ത്രിസഭയില് അംഗമാകാന് തനിക്ക് കഴിഞ്ഞു. മീനാക്ഷിലേഖി പറഞ്ഞു.
മോദിയുടെ ഗ്യാരന്റി കേരളത്തിന്റെ കൂടി വികസനത്തിനുള്ള ഗ്യാരണ്ടിയാണ്. ജി20യും ചന്ദ്രയാനും എഐയും മേക്ക് ഇന് ഇന്ത്യയും റോക്കറ്റ് വിക്ഷേപണവും സ്റ്റാര്ട്ടപ്പുമെല്ലാം മോദി സര്ക്കാര് യാഥാര്ത്ഥ്യമാക്കി. മോദി സര്ക്കാര് അധികാരത്തില് വരുമ്പോള് കേവലം 11 കോടി ജനങ്ങള്ക്ക് മാത്രമാണ് ബാങ്ക് അക്കൗണ്ടുകള് ഉണ്ടായിരുന്നത്. 52 കോടി ബാങ്ക് അക്കൗണ്ടുകള് സര്ക്കാര് അധികാരമേറ്റ് നാല് മാസങ്ങള് കൊണ്ട് ഉണ്ടാക്കാന് കഴിഞ്ഞതായും മന്ത്രി പറഞ്ഞു.
കാസര്കോട് കേന്ദ്ര സര്വകലാശാല സോഷ്യല് സയന്സ് വിഭാഗം തലവന് ഡോ. നാഗരാജു ചടങ്ങില് അധ്യക്ഷത വഹിച്ചു. പ്രജ്ഞാ പ്രവാഹ് ദേശീയ സംയോജകന് ജെ. നന്ദകുമാര്, നെഹ്റു യുവ കേന്ദ്ര യൂത്ത് ഓഫീസര് സി. സനൂപ്, എന്വൈസിസി കണ്വീനര് കിരണ് എസ്. കുമാര്, അഡ്വ. ശ്യാം ശങ്കര്, ഹരീഷ് ബി. കടയപ്രത്ത്, എ.എന്. അഭിലാഷ് തുടങ്ങിയര് സംസാരിച്ചു. ദേശീയ യുവജന ദിനാഘോഷ പരിപാടികളുടെ ഭാഗമായി കലാകായിക മേഖലയില് നടത്തിയ മത്സരവിജയികള്ക്കുള്ള സമ്മാനദാനവും മന്ത്രി മീനാക്ഷി ലേഖി നിര്വ്വഹിച്ചു.
