വയനാട്: മാനന്തവാടിയില് നിന്ന് ഇന്നലെ പിടികൂടിയ തണ്ണീര് കൊമ്പന് ചരിഞ്ഞ സംഭവത്തില് പ്രതികരിച്ച് വനംവകുപ്പ് മന്ത്രി എ കെ ശശീന്ദ്രന്. വളരെ സങ്കടമുണ്ടാക്കുന്ന വാര്ത്തയാണിത്. വനത്തിലേക്ക് അയയ്ക്കുന്നതിന് മുൻപേ പരിശോധനകൾ നടത്താൻ തീരുമാനിച്ചിരുന്നു. പരിശോധനകള് നടക്കുന്നതിനിടയില് തന്നെ തണ്ണീര് കൊമ്പന് മരിച്ചതായുള്ള വിവരമാണ് ലഭിച്ചതെന്നും മന്ത്രി പ്രതികരിച്ചു.
എല്ലാ കാര്യങ്ങളും സുതാര്യമായാണ് നടന്നത്. തുടർ നടപടികളും സുതാര്യമായിരിക്കും. പോസ്റ്റ്മോർട്ടം കേരളവും കർണാടകവും സംയുക്തമായി നടത്തുമെന്ന് വനംമന്ത്രി എ കെ ശശീന്ദ്രൻ അറിയിച്ചു. സൗമ്യ ശീലനായ ആനയായിരുന്നു. വിദഗ്ധ സമിതിയെ വെച്ച് സംഭവം പരിശോധിക്കും. ശാസ്ത്രീയമായ – സുതാര്യമായ അന്വേഷണം നടത്തുമെന്നും വനംമന്ത്രി പ്രതികരിച്ചു.
ജനങ്ങളുടെ ആശങ്ക പരിഹരിക്കാനാണ് ആനയെ പിടികൂടിയത്. മാനന്തവാടിയിലെ ജനങ്ങൾ സഹകരിച്ചു. നടപടി ക്രമങ്ങളിൽ വീഴ്ചയുണ്ടായില്ല. തണ്ണീര് കൊമ്പന് ചെരിഞ്ഞതില് ദുരൂഹത ഉള്ളതായി സംശയിക്കുന്നില്ല. ആന മയക്കുവെടിവെച്ചിട്ടും ശാന്തനായിരുന്നു. അതിന്റെ കാരണം അറിയണം. പ്രാഥമിക പരിശോധനയിൽ പ്രശ്നങ്ങൾ ഉണ്ടായിരുന്നില്ല. സാധാരണയില് നിന്ന് വ്യത്യസ്തമായി മക്കുവെടിവെച്ചിട്ടും ഇത്രയും ആളുകള് പ്രകോപനപരമായി പെരുമാറിയിട്ടും ശാന്തത കൈവിടാതെ നിന്നത് എന്തുകൊണ്ട് എന്നുള്ളത് സവിശേഷത ആയിരുന്നു’, മന്ത്രി പറഞ്ഞു.
കർണാടകയ്ക്ക് കൈമാറിയ ശേഷമായിരുന്നു കൊമ്പൻ ചരിഞ്ഞത്. ആരോഗ്യനില മോശമായിരുന്നുവെന്നാണ് വിവരം. 17 മണിക്കൂർ നീണ്ട ദൗത്യത്തിനൊടുവിലാണ് തണ്ണീര് കൊമ്പനെ ഇന്നലെ കര്ണാടകയിലെത്തിച്ചത്. ഇന്നലെ പുലര്ച്ചെ മുതല് വയനാട്ടിലെ മാനന്തവാടി നഗരത്തിലിറങ്ങിയ തണ്ണീര് കൊമ്പനെ രാത്രിയോടെയാണ് മയക്കുവെടിവെച്ച് പിടികൂടാനായത്. തുടര്ന്ന് എലിഫന്റ് ആംബുലന്സില് കര്ണാടകയിലേക്ക് കൊണ്ടുപോവുകയായിരുന്നു.
