കൊച്ചി: മുതിര്‍ന്ന പൗരന്മാരെ സംരക്ഷിക്കേണ്ടത് വലിയ ഉത്തരവാദിത്തമാണെന്നു ഹൈക്കോടതി. അനാഥയായ 85കാരിക്ക് സ്വന്തമായൊരു വീടുവയ്‌ക്കാന്‍ തണ്ണീര്‍ത്തടം നികത്തുന്നതിന് അനുമതി നല്കവെയാണ് കോടതി നിരീക്ഷണമുണ്ടായത്.
നെല്‍വയല്‍-നീര്‍ത്തട സംരക്ഷണ നിയമത്തിന്റെ പരിധിയിലുള്ള ഭൂമിയില്‍ 10 സെന്റ് നികത്തി വീടു വയ്‌ക്കാന്‍ ജസ്റ്റിസ് പി.വി. കുഞ്ഞികൃഷ്ണന്‍ അനുമതി നല്കി. വയോധികരുടെ സംരക്ഷണം എല്ലാവരുടേയും ഉത്തരവാദിത്തമാണ്. മുതിര്‍ന്നവര്‍ നമുക്കു മുന്‍പേ നടന്നവരാണ്. അവര്‍ നല്കിയതാണ് നമ്മള്‍ ജീവിതത്തില്‍ അനുഭവിക്കുന്നത്. അതിനാല്‍ അവരെ ഏറെ ബഹുമാനത്തോടെ കാണണമെന്നും കോടതി ചൂണ്ടിക്കാട്ടി. ഭര്‍ത്താവും ഏക മകനും മരിച്ചതിനാല്‍ അനാഥമന്ദിരത്തിലാണ് വയോധിക കഴിയുന്നത്.
കൊച്ചി ദ്വീപ് മേഖലയില്‍ ഇവര്‍ക്കു സ്വന്തമായി 81 സെന്റ് വയലുണ്ട്. എന്നാല്‍ ഈ വസ്തു നെല്‍വയല്‍-തണ്ണീര്‍ത്തട സംരക്ഷണ നിയമത്തിന്റെ പരിധിയില്‍ വരുന്നതായതിനാല്‍ റവന്യൂ അധികൃതര്‍ ഭൂമി തരംമാറ്റം അനുവദിച്ചിരുന്നില്ല. ഇവര്‍ക്ക് ചെറിയ വീടു നിര്‍മിച്ചു നല്കാന്‍ ചിലര്‍ സന്നദ്ധരായെങ്കിലും നിയമവ്യവസ്ഥകള്‍ തടസമായി. ഇതേത്തുടര്‍ന്ന് വയോധിക കോടതിയെ സമീപിക്കുകയായിരുന്നു.
ഭൂമി നികത്തുന്നത് മേഖലയിലെ നെല്‍കൃഷിക്കും പരിസ്ഥിതിക്കും ദോഷകരമാകുമെന്നായിരുന്നു റവന്യു വകുപ്പിന്റെ വാദം. എന്നാല്‍ ഇത് അസാധാരണ കേസായി കണ്ട് നടപടിയെടുക്കണമെന്ന് കോടതി നിര്‍ദേശിക്കുകയായിരുന്നു.
നികത്തിയാലും വലിയ പരിസ്ഥിതി പ്രശ്‌നമുണ്ടാകാത്തവിധത്തിലായിരിക്കണം കുറഞ്ഞത് 10 സെന്റ് ഹര്‍ജിക്കാരിയുടെ ഭൂമിയില്‍ നിന്ന് നിര്‍ണയിക്കേണ്ടതെന്നും കോടതി പറഞ്ഞു. ഹര്‍ജിക്കാരി കോടതിയില്‍ അഭയം തേടിയെത്തിയതാണെന്നും അവരുടെ ആവശ്യത്തോടു മുഖംതിരിക്കാനാകില്ലെന്നും കോടതി ഉത്തരവില്‍ വ്യക്തമാക്കി.
പ്രതികരിക്കാൻ ഇവിടെ എഴുതുക: